OLAC Record oai:paradisec.org.au:KK2-0223

Metadata
Title:		Lamu kap shata hti ai lam (Stars)
Access Rights:		Open (subject to agreeing to PDSC access conditions)
Bibliographic Citation:		Keita Kurabe (collector), Keita Kurabe (depositor), Ndawng Awng (speaker), 2020. Lamu kap shata hti ai lam (Stars). X-WAV/MPEG/XML. KK2-0223 at catalog.paradisec.org.au. https://dx.doi.org/10.26278/5fa2c8c03c6d8
Contributor (compiler):		Keita Kurabe
Contributor (depositor):		Keita Kurabe
Contributor (speaker):		Ndawng Awng
Coverage (Box):		northlimit=27.331; southlimit=23.137; westlimit=95.335; eastlimit=98.498
Coverage (ISO3166):		MM
Date (W3CDTF):		2020-09-13
Date Created (W3CDTF):		2020-09-13
Description:		Transcription (La Ring) E Jinghpaw Wunpawng amyu sha ni lamu kap shata hpe hti lahtek ai lam hpe tsun ga nga jang ndai gaw lamu kap shata hpe kaning rai chye hti wa a ta nga jang anhte Jinghpaw Wunpawng amyu sha ni gaw lamu madai shi la ai da moi. Lamu madai shi la ai shaloi she Jinghpaw ni gaw ndai galaw lu galaw sha hkai lu hkai sha ra wa rai yang gaw hkai lu hkai sha ai nli nhpang ni kaja wa na matu, tu tsawm wa na matu she lamu kap shata yu nna hkai lu hkai sha yang e grai tu kaba loi ai i mayat ai i ga shadawn nsi ri ai nsi awng ai nse nga ai dai ni nga ai hku rai nga. Dai majaw ndai Jinghpaw masha ni shinggyim masha ni anhte Jinghpaw Wunpawng myu ni hpe mahtum mahta ni gaw nli nhpang jaw ai kaw e shanhte sharin dat ai gaw "E shu ni sha ni e lamu kap shata hpe yu nna hkai lu hkai sha mi" ngu tsun ai shaloi hpabaw tsun ma ta nga jang "Ya lamu kap shata hpe jan shang ai hpang e sinna maga de mada de mada mu yaw mara mu yaw jan shingkang rai nmat ding sa gaw shata ndawng na lu, jang shingkang mat ai hpang she mada yu. Rai yang e shata hpe mu yang gaw e kade ya ngu di hti mu ru mu gu mu ngu raitim shu ni e langai ya ngu ai shana gaw shata ndawng ai oi, lahkawng ya shani mung shata nmu mu oi kaji ai nga yang she nanhte shinggyim myi hte nmu ai i. Dai majaw shinggyim myi mu ai shana gaw masum ya re oi" ngu ai da. Rai yang e ya anhte gaw lamu kap shata hpe dai sinna maga de e ya na ten nga yang gaw hkying sanit hkan mada yang e mana hkan nkap ai daina kap sai nga jang gaw daina nnan kap ai shana gaw langai ya nre. Nnan kap ai mu ai shana masum ya rai sai kachyi mi i kap sai kaw na gaw masum ya rai sai. Langai ya lahkawng ya ngu ai shana shata hpe nmu lu ai dai gaw shinggyim myi nmu ai kap gaw kap sai e dai hku nga matsun ai da. Rai yang e "Dai hpe gaw praw ji ngu hti mu oi" nga. Praw ji ngu gaw langai ya lahkawng ya masum ya mali ya manga ya du hkra gaw praw ji ngu hti mu" ngu da. Dai manga ya kru ya sanit ya matsat ya nga shani gaw ndan jinghpa kang re ai da. Shata wa ka-ang hkup i ka-ang hkup e rai wa ai shana gaw ndan jinghpa kang ai ngu ai e ning rai ding yang re i loimi lahkyawk ai lam mung nnga ai kung ai lam mung nnga ai dingkang rai dai hpe ndan jinghpa kang nga. Dai ndan jinghpa kang ngu ai matsat ya rai sai. Ndan jinghpa zawn rai na kang ding yang re shana gaw matsat ya rai sai. Matsat ya shana hpe gaw mi shata hti hkawng ya masum ya hti shut yang mung "E daina gaw matsat ya rai sai shata ndan jinghpa kang sa" ngu na hti shajaw la ai hku rai nga. Rai yang e jahku ya rai sa, jahku ya ngu ai shana gaw dai ndang jinghpa kang ai gaw ndum shami kachyi mi un rai sai. Shi langai ya shana gaw tsawmra un kaba sai i shata chyen ka-ang hkup re kaw na tsawm ra rawt sai. Dai hpe gaw tsap gum ngu na shamying sai shi langai ya hpe gaw. Jahku ya hpe gaw tsap baw un ngu shamying ai. Jahku ya hpe gaw tsa baw un, shi ya lai rai yang gaw shi langai ya ni gaw tsap gum wo ra shata hpe yu yang wa tsap gum dung ai zawn zawn asawn ai da i. Anhte ma yu yu ga le anhte gaw tsap nmu ai nga yang gaw nchye na na re tsap mu ai ni gaw tsap gum dung nga ai zawn zawn dai hku mu ai da shata hpe. Dai majaw tsap gum ngu na shamying ai. Rai sa shi langai. Shi lahkawng shi masum shi mali ya ngu hpe ma grai matsing ma ai. Shi mali ya ngu kaw gaw lai mali ya nga hku tsun ma ai, lai mali ya ngu gaw shi mali ya hpe lai mali ya ngu ai. Shi mali ya gaw hpa majaw lai mali ya ngu tsun a ta nga jang jang shang ai hte shata zawt i bum kaw na shata le re ai shata a shingkang shingwang mu lu ai majaw i shata ze rai pru wa ai hte jan lup rai mat wa ai lai re gaw shi mali ya shani ang ai. Dai majaw shi mali ya nngu sa lai mali ya nga di shamying ai da dai gaw moi na ni tsun ai. Ya mung dai hku sha lang ai i shata hti ai kaw. Rai yang she shi manga ya Myen ni gaw la-pyi ndai shi manga ya hpe gaw shata hpung ang nga ai. Shata hpung ang ngu ai gaw hpa majaw shata hpung ang ngu a ta nga jang shi a htoi hkung ai lam wa grai ang sai. Grai htoi hkung sai htoi hkung dik ai shana rai sai dai shi manga ya gaw. Shi kru mung gau ngwi ngwi yawm wa sana. E dai majaw hpung ang ngu shamying ai da. Ya dai hpung ang hpe kaning bai tsun ma ta nga jang shagawng shana mung nga ai. Shagawng shana ngu ai hpa majaw shagawng shana ngu ai nga yang htaw shagawng bum kaw she bum ntsa kaw she e shata wa ahkyeng kaba wang rai na bum ntsa kaw ra htit dai zawn zawn san ai majaw shagawng shana ngu ai. Bum shagawng kaw dung nga ai zawn san ai majaw e shagawng shana ngu shamying ai nga dai gaw shi manga ya hpe dai hku shamying ai lam hpe chye lu ai dai hku tsun lai wa masai. Shi kru ya hpe gaw kaning ngu bai shamying ai i nga jang Nje gan ngu shamying ai. Nje gan e hpa majaw nje gan ngu ai i nga jang she jan shang mat wa ai hpang shata garai npru kachyi mi sin ai jahkring mi manit mali ram manit manga ram nsin chyip nga sin ai. Dai ten hpe nje gan ngu, hpa majaw nje gan ngu i nga jang shata wa she kadai mung nlu je ai shara kaw makoi lagan nga ai, lagyim nga ai zawn zawn nawn ai shinggyim masha ni shata rai npru ai hpe. "Mana pyi pru ai i shi manga ya pyi pru sai htoi hkung sai wa ya dai na pru kau ngu yang me nmu mat jang she makoi mat ai i lagyim mat lagan mat ai" ngu na nje gan ngu ai. Ndai ga malai kaw "Nje gan shana chyahkyi sau sau ai nga" tsun ma ai. Kaja wa dai shata shi kru ya shana dai ningsin sin ai nje gan aten manit mali manga daram hta chyahkyi lu gap ai dai chyahkyi gaw sau rawng ai. Kaga ten hta chyahkyi gaw kade kaba kaba sau nrawng ai nga tsun ma ai. E dai gaw ngai ma mu yu ai i anhte ga kaw Sara Kumji Naw ngu ai lana mi dai chyahkyi sau, sau rawng ai mi gap wa nna shata yu yang gaw kaja wa nje gan shana ang ai hku rai nga. Shi sanit, rum hpang sanit nga sai dai hpe gaw. Shi sanit ya hpe gaw rum hpang sanit ngu ai. Hpa majaw rum hpang sanit nga ta nga jang ndai shata wa shi manga ya kawn gau ngwi ga ngwi gau ngwi ye rum wa ai lam nga ai majaw rum ngu shamying ai. Dai rum hpang sanit ya ngu ai shi sanit hpe shi sanit nnga sai. Nkau gaw rum hpang sanit ya nkau gaw rum sanit ya nga tsun ma ai. E ndai gaw shata gau ngwi ngwi ngwi ye rum wa ai re majaw dai hku tsun ai. Rum hpang sanit, rai yang gaw ndai rum hpang sanit hpe gaw moi na ni gaw nat jaw prat e gara hku bai tsun ma ta nga yang dai rum hpang sanit ya shana shata sin ai shana gaw nam na matse labye ni hkrit ra ai baw chyahkyawn sharaw ni grai hkawm grai wam ai i mare de mung shang ai moi gaw. E dai re shana grau na gaw ndai tsa dan nat ni ma e shinggyim masha ni hpang de sa du gawan hkawm ai aten ahkying nhtoi shana re ai nga tsun ma ai. Dai majaw moi na ni gaw rum hpang sanit ya shani gaw bu nhkawm ai shani ma nhkawm ai shana ma nhkawm ai. Raitim dai jaugawng ni rai jang gaw rum hpang sanit hta nje gan shana hta shan gyam sha ma ai. Dai gaw moi na ni a lai ladat i. Rai yang gaw ya gaw shi sanit rum hpang sanit. Shi matsat hpe gaw e dai hku tsun sai. Shi jahku gaw rum shingbut nga ma ai. Rum shingbut ngu ai gaw e rum wa na i hpang jahtum rai sai i. Nsin sin ai hpe rum rum rum ngu tsun ai gaw rum jahku e ngut sai. Hkun rai jang gaw hkun lawm rai sai rum nnga mat sai hkun lawm nga sai. Hkun lawm ngu gaw hpabaw hkun lawm ai i nga jang ngai lahkawng masum ya hti ai wa hkun ya shani du wa ai majaw hkun lawm ngu ai. Dai shana gaw e moi na ni gaw dai shana shangai ai ma hpe gaw chyoi chyang hpring ai shinggyim ring ai i myit machyung ding ai nga di tsun ma ai. Dai majaw hkun ya shana shangai ai ma hpe grai shagreng ma ai shanhte. Grai shakung ma ai grai jahpat ma ai nga tsun ai lam na lu ai. Rai yang she hkun langai kawn gaw ya gaw mi na zawn rum nrai sai si langai ngu bai hti sai. E moi na ni gaw hti ai gaw si langai ngu hti sai. Hpa majaw si langai ngu na hti ai i nga jang gaw shayawm la ai, si langai si lahkawng si masum le hkun jahku kaw si jahku ngu da sai. Si jahku kaw gaw si jahku ngut ai hte gaw shata htum sai i hpang e gaw shata htum sai i. E ndai hku Jinghpaw shata hti ai mying gaw ndai hku re. Rai yang e ya hpaji chye ai ni e maram yu ai hku nga yang gaw ndai anhte Jinghpaw ni gaw jan dung ai ngu nga ai re. Jan dung ai ngu ai gaw ndai equator a dingda maga na yin-tsun-dan i dai kaw December shata hkun langai hkun lahkawng hkun masum kaw mungkan a equator a dingda maga jahtum na jan sa lam jahtum na mahkret kaba kaw du ai re patha-wi (lamu ga hkrang pan masa) hku yu ai shaloi i hpaji chye ai ni e dai shaloi gaw jan dung ai ngu Jinghpaw ni gaw jan du ai ngu. Jan dung ai hpe grai shareng ai yaw kade daram shareng a ta, hpa majaw shareng a ta ngu nga ai. Hpa majaw shareng a ta ngu ai hpe bai tsun ga nga jang ndai December shata hkun ya kaw na hkun langai hkun lahkawng hkun masum ndai hte gaw htaw mahtum mahta ga jan rung de ndai nat hkaw hkam ning zuphpawng hpawng ai da. Zuphpawng sa hpawng ai da. Ndai nat hkaw hkawm ni e anhte a e lamu madai hkaw hkam ni nat ni zuphpawng hpawng ai ten wa she namlaw namlap nshamu ai, bungli bungyau nbung ai i samwi wanhkat wanhkut dung ai i. Marang nhtu ai u numji numjoi nngoi ai shagu dumsu nga u wa ni wushat nwam sha ai ntam sha ai dai kaw dumsu nga ni gaw shat lai lai nna dai tinang a wudat shara kaw dung na hpum na nga ma ai. Hpa majaw ndai nbung nbung a ta u numji numjoi ni nshaga a ta dumsu nga ni hpa majaw wushat nsa sha ma ta htaw jan rung de jan hkaw hkam ni zahpawng dung ai mungga madat ai da i mungga madat ai. Shanhte na ai nna ai gaw nchye ai. Ya dai aten gaw e anhte a hkaw hkam ni hkaw seng ni jan mung de mahtum mahta ga de zuphpawng hpawng nga ai ngu ai hpe shanhte myit dum na matu dai hpe hkungga la ra ai hku nna dai hpe madat mara ai hkungga la ra ai hku nna nbung nbung ai. Bungshi nbung ma nbung ai bungyau nbung ma nbung ai i namlaw namlap nshamawt sai nshamu sai. U numji numjoi nngoi sai i ngawn hkawng sharat nngoi sai kahkrit kadawn nshaga sai zim mungkan ting gaw zim re. Dik shale gaw lani mi lana mi gaw dai hku zim re. Dai hpe jan dung ai nga ma ai. Rai yang e ndai jan dung ai hpe gaw anhte Jinghpaw ni gaw hpabaw rai shareng a ta nga jang dai jan dung ai aten hta anhte Jinghpaw gaw hpunru hpunraw namlap namlaw tsi hkrung tsi nan lang ai le i rai yang she ndai hpunru hpunraw namlap namlaw tsi pawt num lang hpe e jan dung ai ten gawt da ma ai. Jan dung ai December shata hkun langai hkun lahkawng hkun masum ndai masum ya hta lup hkawn lahkawn ai. Lup hkawn ngu gaw ndai tsa kaw matsi galaw ai tsi lap lap sumhpa di ai tsi lap sumhpa di ai. Ndai lup hkawn di ai mung majoi di ai nre. Htaw lup hkawn di ai sara langai nga ai num hpawmi salang langai woi ai, moi kaw na i chye ai jan hpe woi shangun ai. E yawng shingnoi gun marai kade mi hkan yang hkan dai shawng na sara ngu ai jan e di ai namlap sha di bang ai yawng e di. Gai gai rai mayut bang ai nre lahkawng masum lahkawng masum hta bang lahkawng masum lahkawng masum di bang lai mat wa, htaw kaw mung dai shawng na jan wa di ai kaw di bang di bang e ya hkying hkum mi daram dai hku di bang ngut ai hpang chyawm gaw tinang tinang mu sai hpe i mu ai hpe chyoi ai hpe namlaw namlap hpunru hpunraw ni hpe di bang ai da. Dai gaw lup hkawn tsi hta ai nga dai gaw jan dung ai hpe mana maka shareng ai ngu hpe tsun mayu ai. Rai yang she le hka kata rawng ai nga du hkra jan dung ai hpe hkungga ai. Nga ni ma dai ten e nga hpu dung ai ngu ma nga ai dai shara kaw sha majaw di nga ma ai shanhte ni nga ma ai. Dai gaw du hkra ladaw a lam hpe tsun ai rai sa nhtoi hte seng ai rai sa. Rai yang gaw shata mying e ya nkau mi gaw hkru ta na hpang ai ni nga ai lo nu wa ni e ramma ni e hkru ta na hpang ai hpe shawng ngai sang lang dan mayu ai. Hkru ta na hpang yang she anhte English shata January hpe hkru ta ngu hti jang Hkru ta January Ra ta February Wut ta March Shala ta htaw jahtum ta kaw nhkru mat ai. Anhte Jinghpaw ni gaw jahtum hkumpa malum nga Jahtum ta gaw July shata kaw wa ang ra ai. Rai yang dai e Hkru ta hpe January kawn hpang sa nga jang July shata kaw marang nhtu ai. Hkru ta hpe January lang jang gaw May shata hta she shanhte a jahtum ta ang mat ai. E ndai hku byin ai dai majaw du hkra ladaw rau nhkru ai ngu. Nhkru ai ngu gaw nkaik ai ngu gaw le i nkaik ai. Dai majaw njaw ai gaw nngu ai Hkru ta na hpang ai ni hpe raitim mung du hkra ladaw rau nhkru ai nhkrak ai ngu hpe tsun mayu ai. Rai sa Maji ta, Maji ta ngu gaw hpa rai Maji ta ngu ta nga jang e htaw mi sha tsun ai e jan nat ga de jan mung ga de hkaw hkam ni, hkaw hkam ni zuphpawng hpawng ai shaloi e shanhte gaw e di wa yang e aw yu wa yang e shawng gaw ndai salang kaji ni shawng yu wa ai. Salang kaji ni yu wa yang she shinggyim masha ni gaw hpabaw tam da ya ai i nga yang maji pu tam da maji palap tam da ya ai da. Tam da ya na dai salang kaji ni yu wa ai hpe dai tam da ya na dai salang kaji ni salang kaba ni du ni yu wa ai shaloi she dai maji pu hte hkap tau la ai da. Dai majaw dai hpe Maji ta ngu na tsun ma ai shamying ma ai nga rai sa. Maga ta nambat lahkawng gaw Maga ta re. Dai Maga ta gaw hpa majaw Maga ta ngu ai i nga jang ndai htaw mahtum mahta ga na ni zuphpawng yu wa ai ni wa maga hpun na yu ni lawm na hku rai nga dai ma salang kaji ni yu ai shaloi maga hpun na yu yang ju mahkret di ahkang hkang ai ni nga re majaw "E ndai gaw Maga ta ngu gaw" ngu raitim nkau mi tsun ai gaw Maga ta maga pu pu ai majaw Maga ta ngu re mung nga, maji ta pu ai majaw Maji ta ngu ai re nga ma ai. Dai gaw jaw yang jaw na raitim mung e Maji ta hta maji pu npu ai ma-um um ai she re majawn jawn ai she re. Maga ta hta maga pu npu ai ya lahtek yu yang moi prat gaw pu ai kun nchye ai e ya lahtek yu yang npu ai. Nai shahkum hkum ai aten she re ndai ma-um um ai ten she re. Moi na salang ni hpe san yang mung Maga ta maga pu npu ai she nga ma ai nga na tsun ma ai. Rai sa masum shata man masum gaw Hkru ta ngu ai nkau mi gaw Hkruq ta ngu tsun tsun re ai Hkru ta. Hkru ta ngu ai gaw hpa rai hkru ta ngu ai i nga yang shinggyim masha ni e myit sim myit sa myit ngwi myit pyaw lamu marang hpawng mat ai majaw myit sim myit sa myit ngwi myit pyaw ai majaw myit kata e hkru taw ai kan hkru ai hpe tsun ai nre myit kata e hkru taw ai kabu awng a taw ai awng a nga ai hpe ngu ai re da. Dai majaw nkau mi gaw Hkru ta nga jang she nai mam lu sha ngai ra nna Hkru ai nga tsun ma ai. E bai nkau mi gaw namlaw namlap ni run hkrat nna hkaraw ninghkrawk ni yawng hpring taw ai hkru taw ai nga tsun ma ai. E kaja wa gara wa teng ai kun gaw nchye ai rai sa Hkru ta. Hkru ta ngut na gaw Ra ta, Ra ta ngu gaw hpa majaw Ra ta ngu ai i nga jang gaw ndai namsi nam ban makrung ni matsun ni ra ta. Tsit tsut prut ra wa ai dai majaw Ra ta ngu ai. Dai ten hta moi na ni gaw hkungran poi grai galaw ai. Mayat maya lam i prut wa ai re majaw e Ra ta kaw hkungran poi grai galaw ai. Rai yang she ya dai Ra ta kaw gaw hkungran poi galaw ai gaw hpa majaw nga yang namlap namlaw matsun prut pru ra sai, dai majaw mayat maya lam hkrak ai ngu ai lachyum la ai hte dai hku galaw ai lam re nga tsun ai. Wut ta wa rai sa Ra ta ngut na gaw mali gaw Wut ta. Wut ta gaw hpa majaw Wut ta ngu a ta nga jang ndai Myen ni gaw lay-u-nauk ai ngu ai. Nbung bung ai sinpraw dingda nbung shawng bung dat yu, dingdung nbung bung dat yu sinpraw nbung ahpawt dat yu, sinna nbung ahpawt dat yu rai nna nbung bung yau yau ai aten hpe e Wut ta ngu ai. Wut ngu ai gaw nbung e awut ai nbung bung awut ai i. Nbung wa awut ai hkahku nbung wa awut wa ai hka nam nbung wa awut wa ai sinpraw nbung awut wa ai sinna nbung awut wa ai dai hpe Wut ta ngu ai. Dai Wut ta ndai hpe gaw hpabaw lachyum la ai i nga jang mi ndai Hkru ta e i shata man masum kaw namlaw namlap ni wa run hkrat sai le. Run hkrat rai yang she ndai Ra ta rai jang gaw bai matsun ni prut wa ra wa ra. Dai matsun prut na matu prut nga ding yang re kaw she dai mi namlap namlaw ni hkrat ai ten hkrat nga ai ni wa she hpun lakying hkan matep mara nga jang prut mayu ai hpun matsun ni shi kam ai daram nlu prut, magyi magaw rai na prut wa ra re majaw ndai hpun labrang hkan matep ai hpun lap jahkraw ni hpe awut jahkrat ra ai ngu na e nbung kanu e gawut dat ai re nga ma tsun ma ai i. Dai majaw sinpra sinna ding dung ding da nbung bung ai gaw maga mi kaw na njahkrat yang maga mi kaw na jahkrat sinpraw nbung e njahkrat ai gaw sinna nbung e jahkrat, sinna nbung e njahkrat ai sinpraw sinna nbung e njahkrat ai lo nga jang dingdung bung e jahkrat e ndai hku na dingdung dingda nbung bung ai re nga dai majaw Wut ta ngu ai rai sa. Rai yang gaw manga Shala ta ngu ai. Shala ta ngu ai gaw shala ning hkra nga ai tsun sai. Shala ning hkra ngu ai gaw marang loi loi hkrat sai hpe shala ning hkra marang loi ran rau hkrat hpang sai i Shala ning hkra. Bai langai gaw hpa majaw Shala ta ngu ai ta nga jang htaw yi shari kaba ni hkan e ndai shala ta si ngu ai ni myin ai aten re. Mana maka hkyeng tsawm ai re gaw ndai ram kaba kaba i e tsawm tsawm tsawm din din re. Grai hkyeng tsawm ai htaw tsan tsan kaw na lahpaw htat ai ni hpun hta ai num ni mu lu ai hku rai nga grai hkyeng htoi ai re majaw mu lu ai. Sa di sha ai shanhte "Oh dai ram ram hkyeng tsawm ai gaw grai mu na re" ngu na di sha yu yang gaw ga mana maka hkri shala ta si ngu gaw hkri dik ai re dai sanyi si hta pyi grau hkri ai. Dan na she manang jan "E shade de hkri ai gaw ngai gaw nsha ai lo" nga manang jan langai gaw ga yu. Ga yu na manang jan langai gaw tum shaw sha yang grai dwi. "Yi ning kata na grai dwi ai she re gaw" nga e dai hpe. E dai majaw dai ten hpe Shala ta ngu shamying ai re. Rai yang she ga shadawn masha ni ning nga ma ai da i ga malai "Yi dai ning jan me gaw shala ta si hpa she re lo" nga ai hku rai nga. Hkum ma ntsawm tim tsawm ai ma i kade ma tsawm na ma nra tim kata myit masin gaw grai kaja ai re lo akyu rawng ai re lo" ngu ai hpa le i. E la hpe mung dai zawn nga ma ai raitim la hpe gaw dai ram ntsun ai num hpe sha malawng tsun ai le, nga ai da. Shala ta, Shala ta ngu ai gaw dai shata man kru gaw e Shala ta ngu gaw jahtum Shala ta Shala ta ngu gaw kum pa mung nga sai da lo marang htu ai majaw le i marang kumpa shala ai majaw mung Shala ta ngu ai re da. Shala ta ngut na gaw Jahtum ta. Jahtum kumpa malum Jahtum ta ngu ai gaw ma ni na ndai July shata kaw rai nga marang htu dik ai aten i. Pru prang nmai laban bat ting ting marang htu shi ya ting marang htu re dai hpe Shala ta ngu ai. Shala kumpa shala, shala ta kumpa shala jahtum kumpa malum kumpa gaw nkam tim moi gaw lam hkawm yang i bum ga gaw hkumpup hkumpa kaw malum ai ngu gaw hkumpup kaw lagaw wa hkru, hkrup hkrup rai di lim lim rai di hkawm ra ai majaw dai hpe hkumpa malum ai ngu tsun ai i. Gai Jahtum ta ngut na gaw Shangan ta. Marang htu dik ai gaw Jahtum ta rai sa "Sangan kumpa kan" da. Sangan ta hta gaw shata man matsat rai sai mani ma ni na aten rai sai shata man matsat. Rai yang gaw Shangan kumpa kan ngu gaw jan mai dat marang htu dat mi nawn na nawn ai kumpa ni gaw loi kan wa sai i loi kan wa sai dai majaw Shangan kumpa kan ngu sai. Dai gaw shata man matsat gai shata man jahku. Shata man jahku gaw ndai September shata rai nga ai Shi Mari ta ngu sai. "Shi Mari ning shung kri" da i. Ya ndai daini gaw shi masum i ndai shata shi mali shi manga shi hkru nga jang gaw jahpawt manap u goi mahka de katsi sai. Bung tsin katsi sai numri hkrat sai e dai hpe Shi Mari ta ngu ai. Shata man jahku hpe gaw Shi Mari ta "Shi Mari ningshung kri" nga tsun ai. Shi Mari ta hta gaw hpa majaw Shi Mari ta ngu ai i nga yang ndai padin palang de na shiga ni loi loi kachyi chyi na lu sai i raitim teng ai nteng ai hpa nchye i shiga loi loi na lu ai. Rai yang gaw Shi Mari ta ngut jang gaw gup shi ta i. Mi shiga teng nteng teng nteng na ai ni gaw masha wa pru prang sai le i lamu ga lahkun hkraw jang she e shata man shi hta nga jang gaw e mam mu na mam ni dan sai le. Lam ni pru sai lamu mung marang mung hpawng sai re majaw wa wa sa sa manam masha law sai majaw mi shiga teng nteng nga shiga ni wa shiga shagup di na lu ai majaw Gupshi ta shiga shagup di na lu ai majaw Gupshi ta ngu da i. Gupshi ta ngu sa re shata man shi, Matung ta mung ngu ai Guptung ta mung ngu ai i raitim ya ngai gaw hpu ga e nga ai majaw nga kaba ai re majaw Matung ta ngu ai hpe malawng grau na chye na nngai. Matung ta ngu ai gaw hpa majaw Matung ta ngu ai i nga yang she ndai shana maga hkying masum hkying mali kaw na gaw ndai chyama ngu ai hkrung kanu langai mi hkanam de na hkahku de pyen lung wa ai. Hkahku na yu ai nre lu hka nam kaw na dingda de na dingdung de pyen lung wa ai. Gara kaw pa ma ta nga jang e nlung de pa ma ai lung ga kaw pa ai. Lung ga de pa na nlung loimi wap wap re kata de kanaw shang mat wa ai dai kaw shingbyi ma ai. Matung ta chyama pyen ai grai pyen u sai mana maka pyen u sai dai hpe Matung ta ngu shamying ai. Nkau mi gaw Guptung ta ngu ai. Guptung ta ngu ai lachyum gaw mi sha ngu ai i shiga ni wa atsawm sha shagup sai. Atsawm sha a dumgre lu sai shiga ni gup ngut sai e yawng zeng rai sai. Tung ai ngu gaw grai an ai hpe ngu ai rai nga um Guptung ta. Dai na shata man shi lahkawng gaw hpabaw re i nga yang nkau mi gaw Kala ta nga ai. Kala ta ngu ai gaw ndai mi sha tsun ai jan rung de sa na shaloi Kala lakung i Kala lakung daw nna ndai Kala lakung hpe she jan lam tawn da nna e jan rung sa na matu zuphpawng hpawng na hku rai nga. Dai majaw Kala ta ngu na shamying ai. Bai ya anhte nkau mi rai jang gaw Ladi ta ngu shamying ai. Ladi ta dai shata shi lahkawng hpe le i hpa majaw Ladi ta ngu shamying a ta nga jang nshung shake rai sai nshung shake ngu gaw grai kashung ai aten rai sai. Rai yang gaw Ladi ta ningshung tau wak ai law kawa hpun ju di dum pak ai law" wan mang de ju ai hpe tsun ai le i E Ladi ta ngu hpe gaw kashung di nyep san kapya yang she e hpa mi kap kap nyep san kapya jang gaw ladi magra mayu wa, ladi katsut mayu wa rai yang she majap magra ai lata mung ladi magra nyep hkyi, nyep san katsut wa ladi hkrai masawp ladi kahtet kahtet re majaw i Ladi ta ngu shamying ai nga tsun ma ai. Rai yang gaw ya ndai Ladi ta kawn gaw Ladi hta htum ai hte gaw mi na Maji ta de bai nhtang sai. Rai yang e daini anhte atsuya shata hte loimi jahkru yu gaw nga jang gaw ndai hku re. Ya ndai Ladi ta December gaw ga shadawn i December shata mi sha tsun ai jan dung ai hkun masum hkun langai hkun lahkawng hkun masum jan dung ai. Jan dung ngut ai hte jan rawt ai ngu sai anhte Jinghpaw gaw. Shaning nnan rai sai jan rawt ai kaw na shaning nnan ngut sai dai kaw na she Maji ta ngu shamying ai. Rai yang gaw December shata hkun jan ya kaw na gaw Maji ta rai sai i malawng gaw dai hku byin ai. Ya chyawm gaw ndai mungkan loi sit sit rai yang gaw nhtoi sit ai lam gaw nga chye ai le i. Raitim mi moi na madung lang ai gaw jan rawt jan dung ngut ai kaw na gaw jan rawt sai. Dai hkun masum jan dung ai hkun langai hkun lahkawng hkun masum jan dung ai, hkun mali hkun manga jan rawt sai. Dai kaw na gaw Maji ta jan rawt ai ngu ai. Dai gaw shaning nnan rai sai moi anhte Jinghpaw. E ya Jinghpaw shata hti ai gaw dai hte hte tsun yang gaw tsawmra gaw rai sai. E naw tsun na chyawm gaw Maji ta ngu ai gaw hpabaw Maji ta ngu tsun ai hte maren Maji ta hta hpabaw u shaga ai hpabaw hkai lu hkai sha mai ai hpabaw namsi namsaw ngai ai i ndai ni naw nga ai. Ndai ni chyawm gaw hpang de anhte bai jahkrup la ga ngu. Ndai ma grai ahkyak ai ya ngai gaw grai mahkawng da ai i. E rai yang gaw dai hte tsun lu ai majaw grai kabu ai law. . Language as given: Jinghpaw
Format:		Digitised: no Media: Audio
Identifier:		KK2-0223
Identifier (URI):		http://catalog.paradisec.org.au/repository/KK2/0223
Language:		Kachin
Language (ISO639):		kac
Rights:		Open (subject to agreeing to PDSC access conditions)
Subject:		Kachin language
Subject (ISO639):		kac
Subject (OLAC):		language_documentation
		text_and_corpus_linguistics
Table Of Contents (URI):		http://catalog.paradisec.org.au/repository/KK2/0223/KK2-0223-A.wav
		http://catalog.paradisec.org.au/repository/KK2/0223/KK2-0223-A.mp3
		http://catalog.paradisec.org.au/repository/KK2/0223/KK2-0223-A.eaf
Type (DCMI):		Sound
Type (OLAC):		primary_text
OLAC Info
Archive:		Pacific And Regional Archive for Digital Sources in Endangered Cultures (PARADISEC)
Description:		http://www.language-archives.org/archive/paradisec.org.au
GetRecord:		OAI-PMH request for OLAC format
GetRecord:		Pre-generated XML file
OAI Info
OaiIdentifier:		oai:paradisec.org.au:KK2-0223
DateStamp:		2021-08-24
GetRecord:		OAI-PMH request for simple DC format
Search Info
Citation:		Keita Kurabe (compiler); Keita Kurabe (depositor); Ndawng Awng (speaker). 2020. Pacific And Regional Archive for Digital Sources in Endangered Cultures (PARADISEC).
Terms:		area_Asia country_MM dcmi_Sound iso639_kac olac_language_documentation olac_primary_text olac_text_and_corpus_linguistics
Inferred Metadata
Country:		Myanmar
Area:		Asia