OLAC Record oai:paradisec.org.au:KK2-0121

Metadata
Title:		Ji woi makam hte dai ni (Religion in the past and today)
Access Rights:		Open (subject to agreeing to PDSC access conditions)
Bibliographic Citation:		Keita Kurabe (collector), Keita Kurabe (depositor), Labya Naw Din (speaker), 2019. Ji woi makam hte dai ni (Religion in the past and today). MPEG/X-WAV/XML. KK2-0121 at catalog.paradisec.org.au. https://dx.doi.org/10.26278/5fa2c72a4f623
Contributor (compiler):		Keita Kurabe
Contributor (depositor):		Keita Kurabe
Contributor (speaker):		Labya Naw Din
Coverage (Box):		northlimit=27.331; southlimit=23.137; westlimit=95.335; eastlimit=98.498
Coverage (ISO3166):		MM
Date (W3CDTF):		2019-05-03
Date Created (W3CDTF):		2019-05-03
Description:		Transcription (La Ring) Shinggyim masha shangai shaprat wa ai lam. Jiwoi makam hte daini ngu ai hte seng nna gaw jiwoi ni jiwa ni kam da ai kam hkrat wa ai nga jang gaw anhte shinggyim masha ni a matu kadai mung kadai hkai da ai maumwi ngu ai nga ai re hte maren chyum laika kaw na npawt hpang tsun ga nga jang gaw Yuda masha ni a kam ai lam gaw Yuda ni a hpan da ai maumwi hta shinggyim masha hpe hpan wa ningsang Karai Kasang e shi hte hkrang nsam bung ai shinggyim masha hpe ga yun hte shachyaw nsoi nsa gawut bang ya nna asat hkrung nga sai. Npawng nhpang laika daw kaba langai kaji hkun kru, daw kaba lahkawng daw kaji sanit kawn shi jahku e daw kaji hkun langai daw kaji hkun lahkawng "Shawng na masha Adam yan Ewa dai yan gaw myit dinghpring san seng na rai masai. Hkum da ai namsi sha nna npawt nhpang laika daw kaba masum daw kaji langai kawn hkun mali hta "Yubak hkum tai mat sai". Dai gaw shinggyim masha ni a prat pra wa ai Yuda htung Yuda ni a makam hku na nga yang raitim daini anhte Jinghpaw Wunpawng sha ni a makam hku na bai hkai ga nga jang gaw hpan wa ningsang chye wa ningchyang gaw n-gawn chyalun hte Hkunggam woi shun yan hpe hpan. Dai yan lahkawng kaw na masha hpan lahkawng hpe shaprat ma ai dai hku kam ai. Ndai gaw Ka-in yan Abela hta ang ai hku re. Hpung mi gaw sumnung shingdi, hpung mi gaw gumrawng gumtawng re masha hpung lahkawng mi bai tai mat wa ai. Dai majaw gumrawng gumtawng re ai ni hpe e kaning ngu shamying a ta "Daru gumrawng magam sindawng" ngu nna shanhte a mying gaw dai hku rai mat sai. Wo ra sumnung shingdi rai ai ni gaw "Daru chyanyi magam shapyi" ngu ai hpung ni rai nga ai. Ya ndai gaw Daru gumrawng magam sindawng ngu ni gaw "Kadai hpe mung kadai hpe mung nhkrit kadai hpe mung nhkungga kam mung nkam anhte kam mara rai na nga pra ai ni she rai ga ai" ngu nna masha hpung mi dai hku nga mat sai. E bai langai mi hku nna gaw "Anhte gaw galoi raitim mung shada da tsawra n-gaw nja rai nna shada hkungga lara madat mara rai na jawm nga jawm pra rai na nga ga ai. Anhte gaw wo hkakrit hkadawn hpe rim la nna hkungga nawng jau chyai rai na nga ai ni rai ga ai, anhte amyu gaw daru chyanyi magam shapyi ngu ai ni rai ga ai law" ngu nna hkai ma ai. Ya ndai gaw hpa hpe tsun ai ta nga yang shinggyim masha ni nga pra wa ai lam hta e mashang wa hkum bai maga na wa hpe ga dat yang ja nhkyi hte kadoi hkra kau nna nat hkum tai mat ai. Dai wa hpe dap hkun e sin rem bau da ma ai. Lu sha sha na rai jang shi hpe loimi mahti jaw hka lu na ria jang loimi hprek ru kau, tsa lu na raitim kachyi mi hprek di nna "Kanoi nat" ngu na shi hpe hkungga jaw jau nga mat wa masai. Dai gaw Jinghpaw masha ni a hkai lam rai sai. Rai yang gaw Wunpawng sha ni ginru ginsa npawt labau hku nga jang gaw B.C hkying lahkawng ndai ten hta e shinggyim masha amyu langai gaw tinang a ginru ginsa labau nchye yang jahtum e bra mat htum mat kaga amyu ni ka-up kau ai kaw kre mat na. Ka-ang shingra ga Monglia a shingdu shingnu mung kaw nna Mongolia lai Tibet mung hku lai yu wa ai majaw Tibet ga hte Miwa ga shawng na aga rai sai. Jinghpaw ga hkum gaw majoi shingra a lahta tang lata tsang beyond Himalaya kaw na hpang sai. Ndai ga gaw Jinghpaw ga shaga ai ni hte sha seng ai nrai, labau rum ginru ginsa rum htunghkying rum gumgun gumhpai rum akyang lailen jasat rum numwawn numla rum ai Jinghpaw Wunpawng sha hte Lisu Jinghpaw Maru Lashi Azi Nung Rawang lawm ai ma hkra hte seng ai. Gumhpawn mying gindai rai sai. Dai gaw Jinghpaw amyu sha ni a ginru ginsa npawt labau gawn ai lam rai sai. Bai nna mali ngu na hta gaw jiwa ni a ginru ginsa hkrun lam hpe gawn yu ai lam hku bai tsun ga nga jang gaw Miwa mung mungdan a ka-ang shara "Shanzi" e numdaw mi "Shanghai" e numdaw mi "Tibet" ga e numdaw mi de a lawu daw de gaw wuhpung kaji garan nna yu hkrat wa ai. Miwa mung Mekong hka hkan hkrat wa ai ni gaw Maru Lhaovo ga shaga ai ni Sakhkung hka hkan hkrat wa ai ni gaw Nung Rawang hte Lisu ni Jinghpaw ga naw shaga ai ni gaw Sakhkung hka sinna hkran maga shanang mat wa nna Mali hku majoi de du shang wa masai. Zi Zaiwa ga shaga ai ni gaw Majoi hku a npu Uma ga du ai hpang shara kashun galaw lu galaw sha lai masa amyu myu a majaw Jinghpaw ni ma hkra gaw majoi shingra bum shing nrai ka-ang shingra ga kaw nna yu hkrat wa ai re lam labau gawn da ma ai. Ndai ginra hpe jan shingbut ga mung nga ma ai. Jan manau ngu gaw ju manau shawng nau ai ginra re. Majoi shingra bum ngu ai gaw ka-ang shingra ga dai kaw n-gu si si ai ga mung nga ma ai. Ya ndai shara gaw ga gaw Miwa mung ka-ang shara Shanzi mung rai nga ai. Miwa ga hku Miwa ga hku "Chyung Yan" "Bum Pa Layang" ngu ai re. Dai shara hpe jan hkaw hkam wa up ai jan kasha ni gaw Gam Naw La Tu Tang Yaw lan Yaw wa she madu tai nna manau woi manau ai. Jan kasha ni re jan hkaw hkam a kasha ni re. Hpa majaw nga yang manau nau ai lam jum lang arung arai maka kumla ni ri nhtu chying chyai chyai ai mam ting ai mam nnan sha ai nni htu sha ai e tawn hkungri galaw ai shata mahkawn shayu ai jan lakang lu ai myihtoi lakang dung ai jan tsi hkai ai shingnu mung kaw nna anhte jiwa ni shaning hkying mi manga tsa ning hkaw dung ai dai gaw Ja Taw Naw a maumwi labau kaw Ja Tawng Naw a maumwi labau gaw dai kaw rai nga sai ngu sawn la lu ai. Bai nambat manga hta gaw daini na Jinghpaw Wunpawng buga de ginru ginsa nawt hkrat wa ai lam. Miwa hpyen hpe yen lat Myen mung dingdung jahtum de du shang wa ai lam gaw tsa ban langai A.D hkying mi hkawng tsa ten rai sai. Jinghpaw ngu ai gaw shinggyim masha hpe ngu ai re. Zi Maru Lashi ni mung masha hpe "Byu" nga ma ai. Zi hte Lashi ni asak kaba wa sai ni hpe "Mang Zaw" nga ma ai, Maru ni gaw Lhaovo no gaw "Maw Zaw" nga ma ai. Ndai hte gaw chyurum sha Jinghpaw ni rai nga ma ai matsing hpa gaw Myen Sam ru sai htunghkying nbung ai amyu mayu dama kaga san nrai ma ai. Jiwoi prat kaw nna htunghkying maka rum kahpu kanau mayu dama di kru masum jung rai na nga hkrat wa ai ni shada makyit mahkai sha-ngang shakang grin nga ma ai. Numjaw numla mayu dama shachyen shaga hkungga lara, hpuji hpuga hte shada karum madi shatsawm jahtap hkat shat lit kundawng hkungra lit lahkawng maga, kashu kasha lu jang ma wa ba madun mayu ni gaw nbat sindaw hte shadai lup nhkun htu nri ngu jaw dat. Kasha nlu chye jang mayu ni kaw shaman wa hkam la rai ma ai. Chyum laika hku nga jang gaw Pru mat wa ai laika daw kaba hkun daw kaji shi lahkawng hta ndai hte wa dingdaw lu ai. Rai sai nambat kru hta gaw num la na rai jang hkahku hkanam san ai nsan ai mayu daw ai ndaw ai ma hkra shawng shachyen la ra ai. Hpan ningsang chyewa ningchyang gaw shawng na masha Adam hte Ewa hta sha-ang nna sawn la mai ai dai gaw chyanun yan woi shun ndai yan gaw shanu nen yan shawa nang hpe shaprat. Dai hpang n-gawn wa magam hpe hpungdim shaprat, n-gawn wa magam gaw mungkan ga hpe adup shara hkawm wa sai. Dai gaw Madu Yesu hta ang ai dai wa hpe jiwa ni gaw Alawng ma Yesu nga ma ai. Dai gaw Madu Yesu hta ang sai. Daw kaba sanit nambat sanit hta "Hkristan daru magam a lam". Yesu Hkristu sumsing lamu kaw nna la hkrat wa ai lam manga nga ai. Dai hpe tsun ga nga jang (1) Tsawra ai Yawhan a laika daw kaba masum daw kaji shi kru, 1 Yawhan a shagun dat ai laika daw kaba masum kaji shi matsat. Ding hpring tengman ai lam (Ephesu 4:15) Tara rapra ai lam shanglawt ai hte tengman ai lam gaw nang hpe shalawt dat na. Simsa ngwi pyaw ai hkristan daru magam rai sai. Lamu hte aga a lam hpe n-gawn wa magam gaw kanu yan kawa a asak kaba ugut gu prat shanut nu nna si mat wa ai majaw kanu yan kawa a lup shingbut hpe shi lamu ga dup shara ai kaw na nhtang wa ai hte kanu yan kawa a lup shingbut hpe e ahpum jahtau hkrap let "Ngai nsha hte galoi kaning rai bai hkrum sana rai ta" ngu yang "Ngai nwa gaw htaw ntsa tsang de she rai ni ai, ngai hpe shaga yang mi hprap rai nna du na nngai, mu rai na du na nngai, lahpyaw hpyaw dat yang mung nbung rai nna du na nngai nnu gaw le sung ai shara ga de she rai sai. Kabu gara ngwi pyaw simsa ruyak kyindut ai ten tim shi hpe shaga u ngai nwa gaw lamu de nnu gaw aga kata de rai sai majaw ra wa ai aten hta lamu e aga e ngu nna shaga rit". Kawa gaw sumsing lamu hpe rem sin kanu gaw kanu woishun gaw aga hpe aga sumpawng hpe hpyem shangai ai hpang jahtawng htu kawa hpe bausin shaman ya rit ngu shaga ra ai shadai hpe gaw ga kata de kanu hpe ap ai hku na shadai hpe ga de lu ai rai sai masha gaw wam wam dam dam rai na nmai pra ai. Lamu de kawa nga aga de kanu nga kade hprawng tim nlawt ai ngu kam ma ai. Jiwoi makam hte daini i dai rai sai. Ya ndai kaw gaw hkungran ai lam hte num jaw num ya num wa num la num sa ai lam hte seng nna ndai kumba shalai ai ngu gaw hkungran ai lam hte seng ai re. N-gawn wa magam gaw numraw ma Ja Bang hpe la yang baren bat sha amanam nga ai hpe kumba lap hte arut dat yang she baren sing hkoi wai tsai mat ai dai kaw na Wunpawng sha ni num hkungran yang kumba lai ra ai hkungran mandat dung ai mahkawn shabrang prat na nhpru nmai matsat shabat re arawn alai hte hpe e galai shachyoi shapra la ai rai sai. Jinghpaw masha ni gaw Jinghpaw sai hte baren sai hte gayau ai amyu mung re ngu na mai tsun nga ai. Daw jahku hta Jinghpaw htung tara rapra ai lam. Nga sat nga sa lam hpe yu yang rapra ai hpe grai madung dat ma ai hpe mu lu ai. Hpa galaw tim mung yawn ai kadai nnga hkra woi awn chye ma ai. Mayu dama kahpu kanau kashu kahkri rau dung rau nga hku hku hkau hkau lai hkrat wa ma ai. Ndai gaw nat jaw htung hte up hkang da ai re. Amyu sha lam ni hta numla numya hkungran poi nta dingshawn poi sihkrung sihtan poi yawn hkyen poi kaning re poi lamang hta mung mayu dama kashu kahkri yawng hpe shatsawm dat ma ai. Langai hpe langai ngai hpe sha shatsawm dat yang myit npyaw n-ngawn na re hpe dum ma ai. "Jiwoi ni a makam hta nat jaw htung lai". Uju ulang ten hta nat shan nmat hkra nat shan di hta "Jum nmai chyim nmai kajau sha, sha jang kan machyi si wa ai: ngu ma ai. Daini na hkristan prat hta kaning rai chye nga ga ta sawn yu ra sai. Poi ngut jang shingkra gaida jahkrai nmai yawng hpe shani mung hkru hkru woi sha, shana de mung si man makai hte wa bra shajang ma ai. Mang hpe gaw asak kaba sai ni sha sha ma ai hpa majaw Nu Mang gaw ma ni a myi na hta hkra chye ai ngu nna njaw ai lailen re. Daw shi langai hta gaw "Nkawn magyi jaw ai lam". Nam shan lu gap ten hta shan kaba hpe du htingnu de n-kawn magyi gun bang, dai hpe gaw du gyi salang ni rau jawm sha, mare buga yawng hpe myit ya tsang ya sawn ya rai ma ai. Tsun pat tsun dim timung maren mara garan sha, lagat gat chang la timung maren mara garan sha ma ai. Daw shi lahkawng hta "Hkristan prat hta myit dum ra ai lam". Moi na ji wa ni hkungga hkan hkrat wa ai htung rapra ai lam gaw daini anhte a anhte hta nlang sana kun? Anhte masha shada pyi dai daram tsawra hkungga hkat nga ga yang gaw hpan Madu Karai wa hpe grau kamhpa hkungga ra na re. Masha shada nshayawn Karai hpe mung nshayawn rai ra na sha re. Yesu Hkristu gaw rap rap ra ra byin lu na matu tara rap ra ai lam hpe sharin da ya sai. Myit hpraw san ra ai hpe sharin da ya sai Yesu Hkristu a sasana lam rai nga ai. Madu Yesu Hkristu gaw mahte laika daw kaba kru daw kaji shi hta "Sumsing lamu e myit dik ai zawn ga ntsa e mung dik nga u ga". Sasana galaw ai raitim mung nhkru ai ni a lata hta asak sum mat sai raitim mung Yesu Hkristu sasana gaw hkring mat ai nrai Yesu a sape marai shi lahkawng marai sanit shi latsa hkun hpe mung "Nanhte pru sa nna Yuda mung Samari mung hte lamu ga htum hkra pru sa hkawm let Kawa Kasha Chyoipra ai Wenyi a mying ningsang hta hkalup jaw sape shatai mu" mahte laika daw kaba hkun matsat daw kaji shi jahku. Daw shi masum hta "Nhti hte nri hkring htawng". Jinghpaw a htunghkying hta nhtu hte nri gaw nlang nmai grai ahkyak nga ai. Jinghpaw a asak sumri sumdam hte seng ai seng nna mung shadit jahpang daru magam ahkaw ahkang hte seng nna mung myit arawn alai hte seng nna mung nhtu hte nri hpe sakse sak kan shatai nna lang hkrat wa ga ai. Ndai nhtu hte nri hpe "Mu nat jan rung kaw na jaw dat ai re" ngu kam ma ai. Mudi shayi hpe la yang "Nak" ngu ai nhtu "Daru ri" ngu ai nri hpe jaw dat ma ai. "Sadi sahka hte lang ra ai" ngu na tsun dat ai. Nak nhtu gaw shada dat yang shi hkrai shi kahtam hkawm wa ai. Daru ri mung shada dat yang shi hkrai shi galun hkawm wa ai. Lani mi na mudwi shayi yi sa mat wa ai hpang madu wa gaw nta nga. Uhkai langai mi nta nhku de ya sha sha shang wa wa re majaw shachyut kau tim nhku de sha ashang wa nga ai majaw dai Nak nhtu hte e "Aru e" ngu nna sha shada dat yang uhkai a du hprut rai mat ai. Shana de madu jan bai du wa ai shaloi gaw "Uhkai hparai du di mat ai ta" nga na Mudi shayi wa san dat ai shaloi "Ndai nhtu hte ning sha di ai wa" ngu na sha shada dat yang Mudi shayi a dut hprut rai mat sai. Htaw matsaw ntsa jan rung kaw nna shayi madu kanu kawa mahtum mahta du ni asak sumri sumdam jum yu yang sumri sumdam sumri nu mat sai majaw Mu nat ni shanhte a shayi sha hpe sa kawan yu ma ai. Shaloi Mudi shayi a du hte hkumhkrang kaga ga byin mat ai hpe sa mu ma ai. Mudi shayi hpe jahkrung la nna jan rung de woi mat wa ai Jinghpaw la wa hpe gaw Jinghpaw la wa hpe mung shaga la nna Mudi shayi hpe bai ap ya Nak nhtu hte Daru ri galai kau ya dat sai. Nmai kahtam nmai galun ai nhtu nri galai ya sai. Dai shani kaw nna nhtu nri hpe grai ahkyak ai hku lang hkrat wa saga ai. Daw shi mali "Mayu dama lapran sakse sakkan hku masat lang nga ai lam". Daw kaji langai: Ma shangai wa jang mayu nta de ma wa ba madun yang shadai lup nhkun htu ri hte nhtu nbat sindaw jaw dat ga ma ai. Num jaw ya ai shani shayi ap shaloi numdan mungdan ga nhtu nga nna mung jaw dat ma ai. Tinang kajan ni kamoi ni si yang "Lup htu ri lup dan nhtu N-gawng nyang mawn nba" nga nna mung gun ma ai la sa ma ai. Htingbren pru wa yang mung kanu kawa kaw na htingra hkyen nhtu hte shadaw nhkun htu ri nga na jaw dat ai. Mare nnan de wa yang Uma nta kaw nna htingra hkyen nhtu hte naura htu nri nga na jaw dat ma ai. Nak nhtu ngu nna nbang dap e sha tawn da ma ai chyam nhtu dagam dala yang sha lang ai shakau shanam nmai kadoi ai shingkawt shingkra nmai ai. Mauhkye hka yang nri nhtu ginchyai kaw jum nna tsun machyai ai mauhkye hka ai nhtu ni re. Re gau shaw yang ri nhtu chyingchyai da ai kaw gale lai ra ai. Nlu gale ai wa hpe nla ma ai e Wunpawng mungdan shanglawt dawnghkawn hta lang ai makawp maga laknak re. Kungdawn lit hta bang dat ai hkyen lu hkyen sha galaw lu galaw sha sali wunli asak hte seng ai makawp maga na ninggang tai ai lak nak hku sharung dat ai re. Hkungran poi shani num nnan jan la nnan wa hpe jahpye ai nhpye n-ga gaw "Prat tup galaw jaw tam jaw bau nga rit" ngu ai lachyum hku na jaw dat ai re jahpye ai re ap ya ai re. Hpamaw nhtu kahtam nmai ai shada matut mahkai yang sha lang ai nhtu re. Manau manau yang sha mai lang ma ai sharaw kawng kap ai nhtu poi sa yang sha lang ai. Manau nhtu hku na sha lang ai. Share nhtu majan gasat yang lang ai nmai shingkawt shingkra ai shakau shanam nmai kadoi ai. Moi na salang ni gaw nri nhtung e shanat tawn nhtu hpe gaw tinang a yupra hkra maga e tawn ma ai. Bunghkum npu kaw mung tawn ma ai. Ya daw kaba langai mi daw kaba shi manga hta Yuda makam Yuda ni si yang na gara de wa ma ta? Daw kaji langai, Abela a lam gaw shi a nsen kaw na sha na lu ai. Npawt nhpang laika daw kaba mali daw kaji shi shi langai wenyi gara de du ai ntsun da ai. Abraham a asak wenyi kaji kawoi kaw du nga sai Ishamela kaji kawoi kaw du sai Isak kaji kawoi hpawng ai de du sai. Yaku kaji kawoi hpawng ai de du sai, Enuk jahkrung la ai jahkrung woi la sai. Abraham Isak Yaku ndai ni myihtoi ni nlang hte mung sumsing lamu de du sai ngu ai hku kam ma ai. "Lazaru Abraham a lahpyen e du nga sai" ngu ai lam hpe mung Luka laika daw kaba shi kru daw kaji hkun hta dai hku Yuda masha ni a kam ai lam dai hku rai sai. Damya wa hte Yesu Hparadisu ngwi pyaw simsa ai shara kaw du sai, Luka laika daw kaba hkun masum daw kaji mali shi masum. "Yesu gaw sumsing lamu de shalun la sai Kawa Karai Kasang hkra maga e wa dung nga sai" Luka laika daw kaba hkun mali daw kaji manga shi langai. Maraku laika daw kaba shi kru daw kaji shi jahku. "Jinghpaw ni kam ai si ai hpang na prat". Daw kaji shi matsat hta e JInghpaw ni kam ai si ai hpang na prat, Jinghpaw masha ni kam ai "Si ai hpang na hpang e kaji kawoi hpawng ai de jahku numshe hku lai nna shi ngu na lam nmaw samun lam hku Chyitna ga rai nga ai kaji kawoi ni hpawng ai shara gaw jan rung kawa chyanun wa nga ai shara asak ugut gu nna si ai wa a machyi makaw hte si ai ni a minla wenyi minla gaw kaji kawoi hpawng ai de rai na re" ngu kam ai. Dai de hkrang ai lam hpe Samun lam nga ma ai, Tsu ga Jetna ga mung ngu ma ai. Amyu hte amyu gin gin rai nga ai Kareng ni Maran ni Lahtaw ni ngu ai shanhte a tsu mung kaga san san rai nga ai. Dai majaw num sha ni num wa sai kaw nna gaw kanu kawa nga ai de nmai wa lawm sai. Lupwa nmai pawng sai bai gyit bai paw na raitim mung tinang wa nga ai nta kaw she rai sana re. Sawa si ai lam katsing si ai lam dai ni a wenyi minla mung jahku numshe hku Jangi yan Janga a kasha mahtum mahta wa e sat kau ai pusin hpe azat manyi nna gat dat yang "Ngai gaw wo de ngai gaw htaw de nga nna" lam shagu de bra nna shara hkringdat sai Janga ma sha galang tai nna shi hpe gap sha ai u hkrat taw ai kaw mati kaba tu nna dai hpe di sha ai ni gaw nsu nnawn manawn masham lawhpa myit rawng wa ai. Ka-ang shingra la ni a matu mara ni mung myit nkaja nna hkala nba si wa ai ni wa nga na shara hkringdat tai mat sai. Jinghpaw Wunpawng sha ni yubak mara lu hpang wa ai numbraw jahku. Dai hku tsun la ai. Gai dai kaw na gaw lasa si ai ni hpe shabawn ai shara, n-gam e chyai si ai ni hpe shabawn ai shara, ri nhtu hte si ai ni hpe shabawn ai shara, hka yawng si ai ni hpe shabawn ai shara, dusat dumyen hte si ai ni hpe shabawn ai shara, hpun kawa hte si ai ni hpe shabawn ai shara, ndang si ai ni hpe shabawn ai shara, nbya hpe nbya hku na si mat wa ai ni hpe shabawn ai shara, mahkawn shabrang maku daw ai nna si mat wa ai ndai zawn re ni a minla hpe dai de shabawn bang ma ai. Matsing na matu daini na ten hta mawdaw cycle tsi sha shut prat dep ana daini na dai ni a shara mung naw san ya na zawn zawn rai nga ai. Daini hkristan ning Yesu hte damya wa du wa ai Hparadisu de du na kun Yesu lajang da ai de du na kun, nkaja ai ni gaw nkaja ai de kaja ai ni gaw kaja ai de shara nbung na re. Moi na jiwa ni gaw kaji kawoi ni hpawng ai de ndu wa lu na hpe grai hkrit ma ai. Daw shi jahku, Jinghpaw Wunpawng ni kade na du sa ma ta? Ntsa tsang mahtum mahta ga jan rung jan ga kaw nna ndai mungkan ka-ang shingra ga Asia dan shingnu mung kaw na Mongolia Tibet Miwa ga shaning hku nga yang B.C hkying manga hkan nna Myen mung Thai mung Vietnam Japan mung shawng nnan jan kasha ni Gam Naw La Tu Tang Yaw sinpraw Shapawng yawng pawng yawng wa Miwa hpyen hpe koi yen ai shaloi hka yawng pawng yawng hkrat wa ai ni re majaw pawng yawng sha ni ngu ai rai sai. A.D hkying mi lahkawng tsa ning hkan e Jinghpaw Maru Lashi Lisu Zaiwa Rawang chyurum Wunpawng sha ni ngu ai ndai ni gaw hka yawng pawng yawng hkrat wa ai A.D hkying mi lahkawng tsa daram hkan e Miwa mung kawn hpyen koi yen let hka yawng pawng yawng hkrat wa ai ni. Ndai ni gaw htunghkying lailen num jaw num ya mayu dama kahpu kanau kashu kahkri hpuji hpuga galaw lu galaw sha gatsun gala shachyen shaga makam gumgun langai sha nga langai sha htinggaw mying lu ai Lahtaw Lahpai Maran mungkan ntsa hta anhte Wunpawng myu sha ni hta lai nna mayu dama kahpu kanau san re ai lam gaw mungkan amyu ni hta nnga ai lam gaw mauhpa laklai nga ai. myit hkrum hkahkyin kumdin hpawng de nga ai lam rai nga ai. Mungkan dinghta ga hte sumsing lamu a lam anhte kabye nga ai gaw mungkan ga anhte kabye nga ai kaw nna nbung madin du hkra hpe gaw dinghta ga ngu ai re. Dai nbung ai lahta jan a nsa dep hkra dai hpe ginding aga ngu nna, ginding aga nsa htum ai sharit hpe lamu, lamu a lahta tang hpe sumsung lamu ngu ai hpe chyum laika matsun maroi hta sha gawn la lu ai tsang rai nga ai. Ndai mungkan ga a lamu mungkan ga a lamu ndai lamu a lahta tang jan a shingwang nsa htum ai wo ra hkran daw hpe jan a shingkang nsa htum ai wo hkran hpe e mahtum mahta ga ngu ai rai nga ai. Jinghpaw ni hkai ai majun hta hkai yang sinlap lungpu mung nga ma ai. Lamu a lahta hkran de na aga hpe matsun maroi ga nga ma ai. Sumsing ga sumsing ga mung sumsing ga mung nga ma ai. Masha amyu ni gaw Jinghpaw ni a matsun maroi ga gaw sawn shingdaw yu ai lam she re ngu ai hku sawn la ma ai. Ga shadawn sharaw yan hkang htang mangbya a lam. Wunpawng sha ni a daru magam ahkaw ahkang. (Kaning rai me galai kachyai rai mat wa ai mi re) (Ma na sha gaw rai wa sai mi) Gumchying gumsa up hkang masa gumrawng gumtsa up hkang masa gumlau masa hkristan daru magam masa Jinghpaw ni a up hkang masa gaw lamu hte aga yan hpe matut da ai ngang kang ai up hkang masa rai nga. Lamu de chyanun ga de kanu woi shun hpang wa ningsang chye wa ningchyang e shara jahkrat da ya ai ngu hkap la ai. Up hkang na ahkaw ahkang jaw da sai dai majaw mungdan mare buga de jang chyanun a baw pungkum hpe baw pungkum ngu na nlung hpe shadip jahpang hku na jung da. Ntsa tsang nat madai nat mu nat shaga nna manau dum ra ai. "Ngai nwa hpe mu nat ngu na jaw mi, mi hprap rai na du na nbung rai na du na nnu hte nnu hpe du jawn tawn nat ngu na jaw mi". Ngawn wa magam a aru arat matu mara ni gaw matsaw ntsa mu madai nat hpe hkungga lara hkrat wa ma ai. Gumchying gumsa daru magam mahtum mahta du ni e ka-ang shingra la ni e ginru ginsa hkrat wa ai shaloi lam woi na matu ga shaga chye ai nga wuloi langai hpe jaw dat ai. Nga dai matsun madun ai hte maren Mali hku majoi chyai hku majoi lai Hkrang hku majoi du yang "Nanhte ka-ang shingra la ni ring chying law htam wa manit dai majaw nanhte hpe woi awn na ningbaw ra manit dai. Matsaw ntsa nat ni hpe shaga ngai hpe mung sat hpya shadu nna wunju mung jaw mu. Nye a ladi hte salum hpe hprep bang shalawm mu. Dai numju hpe lahpaw hte makai nna di chyang kaba hta shadu mu. Ladi hte salum shan lawm ai makai hpe shaw hkrup ai wa gaw nanhte hpe woi awn ningbaw na wa rai sana re". Matsaw ntsang nat shaga mahtan nna matan nna shaw dat ai wa gaw Kareng ni a kaji Hkyep La Mai shaw hkrup sai raitim mung dai du wa gaw myit nau kadun mazut nau gumshem ai majaw gumchying gumsa du magam hkrang rai mat sai. Dai du wa hkang ai hku nhkan nmai manau mung du wa sha mai dum ai. Nat hpe mung du wa sha mai shaga ai, shadik jahpang mung du wa sha mai masat jung ai. Matsu mung du wa sha mai lup ai dik chyale du wa sha nchye hpang yang kadai mung mam nmai ting hpang ai. Du wa a amyu du amyu mang hpe sha mai lup ai kaga ni hpe gaw nat kau ra ai. Awa anga nsi naisi shan lu gap yang mung du wa hpe shawng nkawn jaw ra ai. Gumrawng gumtsa up hkang masa gaw ndai daru magam ahkang aya hpe shawa ra lata ai da ai hpe ningbaw shatai ai. Dai lai gaw grai tsawm htap htuk ai tara rai sai. Jin ngut ai ni manau mai dum ai, dawhpum shadaw mai jung ai nkawn magyi njaw ra sai. Daini na Demokrasi lai masa gumlau masa gumchying gumsa gumrawng gumtsa nra sai masa rai nga ai. Tang Mai Ja Ing gaw hpung ing hka hkamung lungdawn la-ing kaw kasha hpe shayu tawn nna baw sa bunghkrut nga ai. Ngut nna gayin yu yang kasha hpe nmu, nbat ginyan taw nga hpe sha mu ai. Ja Ing gaw "Hkamung lungdawn na baren e baren e la ai rai na sai" ngu let singgawng bum na mu hpe jahtau shaga dat ai. "Nye a kasha hpe shaw ya rit ngai nang hpe masum ning re hkainyeng wula ju jaw na". Shing rai dumsa kung ai masha tam hkawm wa yang dumsa La Lawn hpe mu tam la ai. "Ya hkainyeng wula hpe nmu sai majaw ndai nga chyang hpe nga hpraw hkainyeng hku dumsa ya rit" ngu nna shingrai dumsa La Lawn gaw hkainyeng wula re hku dumsa ap ai hpe htaw kanu kawa nga ai ntsa tsang de shalai dumsa La Lawn mung jan ga sitlap rung de du shang wa sai. Mahtum mahta du wa gaw dumsa wa grai nyam ai majaw hkap la ya sai. Mahtum mahta du wa gaw "Ya nang ra ai lam gaw hparai ta" "Nta kaba mare kaba nrai tim nta shagu wan hkut mawng ai hpe ra nngai" ngu wu ai. Dai mahtum mahta du wa gaw nbaw gu tum sanit hte mai-aw ndum dinghkang sanit jaw dat wu ai. Dai La Lawn wa gaw jan rung kaw na yu wa ai hte nbaw hpe kabaw dat yang jahtai htai yawng jahku daram wa law wa nna tsa mung kabun magang law magang kanoi n-gu yam daram dai hpe gam garan yang hproi ai hte na a masha rai na sai. Shanhte dang ai hpe du shatai masai. Raitim mung grai masan sa ai lam nnga ai hkristan prat hta gaw KIO prat du hkra rai sai. Daw hkun langai, hkristan daru magam a lam tsun ga nga jang gaw hkristan masa Yuda makam makam masham kaw na pru wa ai masa rai nga ai. Yesu gaw Yuda htung ningbaw ningla ni woi awn lai masa gram sharai ai wa re. Yesu shangai wa ai shaloi sinpraw mung na hpaji rawng ai ni mu ai shagan gaw Yesu sa galaw na ngu ai madun ai rai nga ai. Dai shaga gaw jut manga rai nga ai, jut langai mi tsawra ai jut lahkawng tengman dinghpring ai jut masum tara rapra ai jut mali shanglawt ai jut manga simsa ngwi pyaw ai. Madu Yesu gaw ndai lam manga hpe byin hkra hkrang shapraw sa wa na re lam hpe madun dan ai re nga ma ai. Madu Yesu ndai lam manga hpe sumsing lamu kaw na la yu wa sai sumsing mungdan hta ndai lam manga hpring hpring tsup tsup nga nga sai. Mahte laika daw kaba kru daw kaji shi, mahte laika daw kaba hkun matsat daw kaji shi jahku sape shi lahkawng, sape sanit shi latsa e hkun ndai ni hpe "Pru sa mu masha amyu shagu hpe hkaw tsun sape shatai let sape shatai mu" ngu nna daini anhte a lata hta rai nga sai hku re. Ga dim gaw daini na anhte hkristan prat hta hkristan ni yawng gaw Yesu hte damya wa du ai Hparadisu de kun, Karai Kasang a hkra maga wa dung nga ai shara de kun kaja ai hte nkaja ai gaw, kaja ai gaw nkaja ai de rai na kun. Jinghpaw Wunpawng sha ni kaji kawoi hte nwa hkrum na hpe hkrit ma ai. Grai sadi nna nga ma ai. Daini na prat hta Yesu yawng a mara raw ya sai. tsang, ntsang ra sai nga nga ma ai ndai gaw tsang ra ai lam rai nga ai. Kaja ai dinghpring ai nding nhpring ai ni kaga ga she rai nga ai na re. Madu Yesu tsun ai "Hpan da ai lam hta myit nhkru ai hpung myit ding ai hpung myu lahkawng myit ding ai masha byin na matu mahtum mahta jan rung kaw nna up hkang ya ai. Yesu gaw bung ai masha nnan shabyin na matu hkahkyin kumdin la sai. Jinghpaw Wunpawng sha ni a tsu shawawn ai shara law law kaw na Yesu lajang da ai sumsing mungdan shara de Wunpawng sha ni up hkang nga ai lai amyu myu kaw nna Yesu hkristu hta langai sha Yesu la yu wa ai lam manga hpring tsup hkra gaw gap ga yang gaw lam shagu hta bawngring wa na ga ai law. Jiwa ni a daru magam ngang ai zawn Yesu a daru magam mung ngang kang nga na sai law. Hkristu a magam hta Rev. Labya Naw Din, Mungding Pa Buga Hkalup Hpung. . Language as given: Jinghpaw
Format:		Digitised: no Media: Audio
Identifier:		KK2-0121
Identifier (URI):		http://catalog.paradisec.org.au/repository/KK2/0121
Language:		Kachin
Language (ISO639):		kac
Rights:		Open (subject to agreeing to PDSC access conditions)
Subject:		Kachin language
Subject (ISO639):		kac
Subject (OLAC):		language_documentation
		text_and_corpus_linguistics
Table Of Contents (URI):		http://catalog.paradisec.org.au/repository/KK2/0121/KK2-0121-A.mp3
		http://catalog.paradisec.org.au/repository/KK2/0121/KK2-0121-A.wav
		http://catalog.paradisec.org.au/repository/KK2/0121/KK2-0121-A.eaf
Type (DCMI):		Sound
Type (OLAC):		primary_text
OLAC Info
Archive:		Pacific And Regional Archive for Digital Sources in Endangered Cultures (PARADISEC)
Description:		http://www.language-archives.org/archive/paradisec.org.au
GetRecord:		OAI-PMH request for OLAC format
GetRecord:		Pre-generated XML file
OAI Info
OaiIdentifier:		oai:paradisec.org.au:KK2-0121
DateStamp:		2021-07-29
GetRecord:		OAI-PMH request for simple DC format
Search Info
Citation:		Keita Kurabe (compiler); Keita Kurabe (depositor); Labya Naw Din (speaker). 2019. Pacific And Regional Archive for Digital Sources in Endangered Cultures (PARADISEC).
Terms:		area_Asia country_MM dcmi_Sound iso639_kac olac_language_documentation olac_primary_text olac_text_and_corpus_linguistics
Inferred Metadata
Country:		Myanmar
Area:		Asia