OLAC Record oai:paradisec.org.au:KK1-2457

Metadata
Title:		Hkrai Gam Hrai Naw (Hkrai Gam and Hkrai Naw)
Access Rights:		Open (subject to agreeing to PDSC access conditions)
Bibliographic Citation:		Keita Kurabe (collector), Keita Kurabe (depositor), Marip Htu (speaker), 2019. Hkrai Gam Hrai Naw (Hkrai Gam and Hkrai Naw). MPEG/X-WAV/XML. KK1-2457 at catalog.paradisec.org.au. https://dx.doi.org/10.26278/5fa2c26c070f8
Contributor (compiler):		Keita Kurabe
Contributor (depositor):		Keita Kurabe
Contributor (speaker):		Marip Htu
Coverage (Box):		northlimit=27.331; southlimit=23.137; westlimit=95.335; eastlimit=98.498
Coverage (ISO3166):		MM
Date (W3CDTF):		2019-02-05
Date Created (W3CDTF):		2019-02-05
Description:		Transcription (La Ring) Moi shawng de da num mahkawn langai mi htaw bum yi kaw e mangai ta e mangai yi mam gawn yi gawn mam gawn rai na wa hpu sumri hte rai na u gawn sa sa re da. Shani shanang u gawn sa u gawn sa u gawn sa rai yang she dai shanhte a yi a wo ra maga de gaw nawng kaba hka kaba nawng lwi ai nga ai da. Dai kaw na baren wa she dai u gawn sa ai num sha dai kaw she wa hpu sumri hku na hkan hkrat wa nhtawm me e dai shi yi wa machya kaw du ai hte shi gaw shinggyim hkum hkrang sa gale nna she dai u gawn nga ai num kasha mahkawn dai hpe e shi gaw sa shaga chyai ai da. Shani shanang dai hku sa shaga chyai sa shaga chyai rai na gaw e hpang e gaw shi gaw ra shan yan ra hkat na myit rawng wa tsawra myit rawng wa rai na she shan yan gaw dai kaw tsawra hkat masai da. Shing rai na gaw dai hku na nga nga rai tsawra hkat na nga nga rai yang she hpang e gaw dai num kasha gaw dinghku hkum rai mat sai da. Dinghku hkum rai jang gaw hpang e gaw ma mung ba la lu rai na she dai Magam ngu na ba sai da. Ba rai na she mare masha ni gaw grai mau ai da. "Dai num kasha dai gaw mare de asaw ale kanang de hkawm ai mung nmu ga yu ai wa ndan re gaw" ngu shanhte gaw mau ai da. Raitim lahkawng masum ning she ndu wa sa dawng, shaloi she hpang shaning hkan na yi hkan e mung e shi gaw u gawn u sin rai jang gaw dai baren la dai gaw galoi mung ahkan nang nga kalang mi tsawra hkat sai re nga yang gaw kanang du tim hkan nang rai sam nga. Shaloi jang she hpang e Manaw wa hpe bai ba sai da. Shaloi jang gaw dai shadang sha lahkawng Magam Manaw lahkawng ba la lu sai da. Shaloi gaw mare masha ni mung mi na hte maren mau ai da. Shi gaw mare anhte shinggyim masha shada gaw "Kadai hte atsaw ale mani shaga ai mung nna yu, nmu yu re wa dan re ma hkawng ting ba la ai gaw" ngu na shanhte gaw mau ai da. Mau rai nga yang she lani hte lani laning hte laning gaw ma hkan nau gaw kaba wa sai da. Ma hkan nau gaw kaba wa rai jang gaw mare na ma manang shada gaw "Nan nau nsan ai kawa mung nlu ai jahkrai ma jahkrai yan ma jahkrai yan" ngu na mare na ni mung kadai mung dai hku ngu ai da. Shaloi jang gaw ma hkan nau gaw na gaya wa nna she "Nu an nau gaw wa mung nlu ai wa i, an nau na wa gaw taw" ngu na kanu hpe wa san ai da. Shaloi gaw wa san ai shaloi mung "Ya hpang e chye wa na ra ai ma" ngu na dai hku tsun ai da. Shaloi she galoi mung dai hku sha arai nga mare hkan na ni dai hku sha tsun rai nga jang gaw kanu hpe bai wa san ai da. Shaloi shan shan nau gaw laning hte laning gaw kaba wa rai jang gaw masum lang ngu na kaw she "Nu wa hpe madun rit tsun dan rit, e si mat sai i kaning re rai. Kaning re nhpa ngu wa rai" ngu na san ai da. E shaloi gaw "Nu nang an nau e wa e sha ntsun dan jang gaw daini gaw an nau gaw nang e gaw sat sana" ngu na kanu hpe dai hku jahkrit ai da. Shaloi gaw "E ma e na wa gaw nan nau na wa hpe e chye mayu jang dai le ra kaw na nawng kaba makau kaw e ndup sa dup mu" ngu na kanu gaw dai hku tsun dan dat ai da. "Shaloi dai kaw pru wa ai dai gaw na wa rai sai yaw" ngu na kasha yan hpe e dai hku na dai mare na ni gaw shan nau hpe "Jahkrai ma jahkrai ma" kawa nlu re nga yang she jahkrai gaida kasha jahkrai ma ngu dai gaw shan nau a Hkrai Naw Hkrai Gam dai kaw mying kap mat ai da. Shaloi gaw kawa hpe san jang kanu gaw hka kau dai nawng makau dai kaw "Ndup sa dup mu" ngu na madun dat ai da. Shaloi jang gaw kaja wa shan nau gaw dai kaw kanu a ga madat nna she shan nau lahkawng dai kaw ndup hkying rai ashe la nna dai kaw ndup sa dup nga sai da. Ndup dup sha nga rai nga jang she dai kawa wa ngu na baren la wa gaw dai shi a shangun ma ni hpe e katsu hpe she "Le le kaw ndup dup ai ni e hkum adup mu dai kaw hkum adup mu le anhte a hkaw hkam wa e anhte a madu baw gara machyi ai da dai kaw hkum adup mu ngu sa tsun su" ngu na katsu e shawng sa wa shangun ai da. Shaloi jang katsu sa wa na she "E ma yan e dai kaw hkum adup mu lo wo madu hkaw hkam na gara baw gara machyi ai da nlu yup ai da hkum dup mu" ngu sa tsun yang she "Hpa da aw nanhte wa mi hpabaw sa tsun a ta" ngu na she dai ndup dup ai hpri lakap ahkyeng re wan jahkyeng da ai she dai hte e lakap kau dat ai da. Lakap kau dat jang gaw katsu mung hkrit nna bai hprawng nhtang shang wa mat. Rai yang she sha adup nga jang she jahkan hpe bai shangun dat ai da. Jahkan e bai shangun dat jang mung jahkan mung dai hku sha sa tsun jang she shaloi mung dai hku. "Hpa da aw nanhte wa mi" ngu na she dai hpri lakap hte bai lakap kau dat ai da. Shaloi gaw e jahkan gaw dai ya du hkra nda nhkrem nhkram rai na hkawm ai dai gaw dai Hkrai Naw Hkrai Gam hkan nau hpri lakap hte lakap matep kau dat ai majaw nda hprawng mat wa ai shani kaw na daini dai jahkan nda mat ai re da. Rai na dai hpang e bai anga zaibru htu sumrawn hpan dai baw e bai shangun dat ai da. Dai dai baw e bai shangun dat jang she dai wa mung dai hku sha sa tsun ai da. Sa tsun rai jang gaw "Nhpa da aw" ngu na she dai wa e gaw dai hpri sumprang hte e hkap achyaw kau dat ai da. Dai rai na ya dai sumrawn a hkum hkan e ateng apang rai na shara lahkawng masum mali rai na ateng apang rai na re gaw dai re da. Rai na she dai hpang e gaw sha adup nga sha adup nga sha adup nga rai jang she "Kaning re masha re ta, kade marai kade e sa hkum dup ngu sa tsun shangun tim sha adup nga ai gaw daini gaw ngai sa wa yu n-ga" ngu na she dai kawa wa baren wa sa wa ai da. Sa wa jang she um "Kaning re kasha yan rai ta, dai kaw hkum dup mu ngu na kade tsun tim nchye madat ai yan gaw kaning re rai nga ma ta" ngu na she dai kawa wa ngu na baren wa gaw sa wa ai da. Sa wa na sa tsun jang she kasha yan gaw "Hpabaw da aw nang wa mi" ngu na she e kawa wa hpe jawm rim shan nau lahkawng jawm rim la na she wo kawng kaw e ladi kaw lashoi shoi la nna hpun dai kawng hkingau nten kaw na hka kau kaw na hpun kaw e dun da ai da. Dai kaw dun da rai yang she dai kawa wa gaw jan ja nna kadau buk lik rai yang she shan nau gaw dai kaw hka hpawng kaw jawn nga ai da. Hka hpawng kaw jawn nga ngai mi baw lim lim re she nre dawng. Shaloi jang she kawa wa gaw dai jan ja nna kadau buk lik nna she shan nau gyit dun da ai sumri dai di na galau wo hka de gumhtawn bang wa she nrai i. Shaloi jang e dai hka de gumhtawn bang wa. Dai kaw she shan nau a langa hpawng ka-ang kaw she dai kawa wa she hpan rai na she gumhtawn bang ai shaloi gaw dai langa hpawng dai di mat wa ai da. Di mat wa jang gaw hka nam de gaw kanau Hkrai Naw wa jawn hka hku maga de gaw kahpu Hkrai Gam wa jawn rai na dai shani kaw na gaw Hkrai Naw wa gaw hka nam de yawng mat wa Hkrai Gam wa gaw hka hku de yawng mat wa rai na shan nau dai kaw hka bra masai da. Rai nna gaw dai kaw na gaw e kanau Hkrai Naw wa gaw hka nam de yawng yu mat wa yu mat wa yu mat wa rai jang she kahtawng langai mi mung langai mi kaw du sai da. Du jang gaw dai kaw gaw shi gaw dai kaw sa wa rai jang she dai mung kaw na ni gaw shanhte hpe dun sha la sha ai masha sha ai sharaw nunglawng kaba nga ai da. Shana shang lani mi masha langai ngai ngai rai na rim sha ai masha pyi lau ma wa mahka rai wa sai da. Shaloi jang gaw shanhte gaw hkrit nna shani ting ting nta shachyip nna hpa mung nlu galaw sha rai na e jang shang wa ai hte gaw shajup ting ting di kau na rawng nga rai na hkrit she hkrit hkrit shee hkrit rai na nga nga yang she dai Hkrai Naw wa pru wa. "E e kade sa ai ma rai nta e anhte pyi hkrit chyu hkrit na nga nga ga ai lo nang dan rai hkum nga hkawm nga lo. Ya jahkring mi masha sha ai sharaw lunglawng kaba du na ra ai" ngu jang she "Hpa nhkrit ra ai hkum hkrit mu ngai nga nga ai nhkrit ra ai hpa nhkrit ra ai" ngu na tsun ai da. Shaloi jang she "Yi nre lo nre lo ma e kaning re ai hpe raitim sha kau ai lo" ngu jang "Nhkrit ra ai ngai sat kau ya na" ngu na tsun ai da. Shaloi gaw dai Hkrai Naw wa gaw ntawng nhtu ngu ai hte nhkang kawngli ngu ai ndan lu ai da shi gaw. Shi gaw dai lu nna hkawm mat wa yang dai kaw la dai wa dai hku dai kahtawng na ni dai hku hkap tsun rai jang gaw shi gaw "Hpa nhkrit ra ai ngai sat kau ya na" ngu na tsun ai da. Shaloi jang gaw "E nang lu sat kau ya yang gaw sat kau ya rit. Nang lu sat kau ya jang gaw anhte ndai mung ndai kahtawng kaw na tsawm shayi nang hpe e lata la shangun na" ngu na tsun ai da. Shaloi jang gaw kaja wa shana de gaw la nga sai da. La nga jang gaw shi gaw jan u gum jan shang wa ten kaw e wo mare shningnawm kaw wat u hkum sharaw kaba wa "Aauh..ummh.." ngu na sa wa ai da. Sa wa jang gaw dai mi na kahtawng masha ni gaw yawng nhku de shawoi na hte raw di na she e hprawng shang mat na chyinghka ni shajup ai gaw shajup rai na rawng nga da. Shaloi jang gaw dai Hkrai Naw wa gaw e dai hku hkap nga sai da. Hkap nga jang she kaja wa sa wa da. Sa wa jang gaw shi a nhkang kungli hte gap sat nna atsawm nsi ai kaw shi a ntawng nhtu hte bai kahtam sat ai da. Dan rai na dai kaw lu sat kau ya sai da. Shaloi hpang jahpawt gaw kaja wa dai kahtawng kaw na ni gaw "Rai sai ya e ndai lu sat kau ya jang gaw anhte myit pyaw sai" ngu na grai kabu let dai kahtawng kaw na e tsawm ai shayi num sha hpe shaga zuphpawng la nna shi hpe e lata la shangun ai da. Shaloi jang gaw shi gaw shi ra ai langai mi hpe lata la sai da. Lata la na dai kaw bai tawn da na shi gaw bai hkawm mat wa. Bai hkawm mat wa jang gaw kahtawng kaw bai du jang mung dai mung dai hku sha shanhte hpe sha ai shalawa nga nna dai hku sha byin ai da. Dan rai jang gaw dai kaw na ni mung dai hku sha rai na she dai kaw mung num dai shalawa dai sat kau ya jang she shayi sha langai bai jaw ai da. Dai mung mi na hte maren shi hpe lata la shangun ai. Rai na shi mung dai kaw na lata la rai na dai kaw mung num lahkawng lu sai da. Shaloi gaw dai mung dai kaw naw tawn da na bai hkawm mat wa yang gaw kahtawng langai bai du ai mung dai kaw mung dai hku sha rai na e kahtawng sanit ngu na kaw e shi dai hku galaw mat wa ai da. Kahtawng sanit kaw rai yang kahtawng langai mi num langai langai langai shi hpe lata la shangun ai da. Dan rai she hpang jahtum na kahtawng sanit ngu na kaw gaw nshalawa langda kaba dai gaw ga de nhkawm ai, ntsa hku na e rim amya sha dai gaw nta ga hku nre da htaw nta ntsa ninggaw shingngu hku na amya shang na hkrai shang rim sha kau kau re ai da. Rai na dai kahtawng kaw na ni mung dai hku mi na hku sha hkrit nna a shana ting ting nyup ai nga. Nta chyinghkyen npu de gaw makoi yu rai na e hkrit nna nga yak nga ma ai da. Dai kaw mung dai wa Hkrai Naw wa shi a nhkang kawngli hte e gap sat kau ya ai da. Shing rai na she dai kaw mung e tsawm shayi langai mi shi hpe e ra ai lata la shangun ai da. Shaloi gaw num sanit du sai da. Num sanit du jang gaw "E ya gaw nye ba hka hku de yawng mat wa ai ba hpe naw hkan tam mat wa yu sana re" ngu na shi gaw dai kaw na num dai woi na nhtang mat wa sai da. Nhtang mat wa na gaw dai kahtawng shagu mi shi lata kau da ai num dai ni hpe wa shaga woi mat wa wa shaga woi mat wa rai na shanhte num sanit hte shi bai lung mat wa sai da. Bai lung mat wa rai yang she hka hku de lung hkrai lung mat lung hkrai lung mat wa rai yang she htaw hka hku na nawng langai mi kaw e woi gumgai langai mi she mi shan nau kahpu hte shan nau rau naw nga nga yang na ja shingwoi dai gaw kahpu wa kaw lawm mat wa na hku rai nga. Shaloi she dai kahpu wa gaw woi num hte wa nga nga ai da. Woi num hte wa nga mat nna nga nga rai yang she dai woi num dai gaw dai mi na shan nau a ja shingwoi dai gun nna she sai gawt gawt sha taw nga ai da. Sai gawt gawt sha taw nga rai jang gaw dai Hkrai Naw wa gaw num sanit woi nna lung wa rai yang she kahpu wa hpe tam lung wa nga yang she woi gumgai dung nga na she "Koi woi gumgai wo ra moi na an nau a jang shingwoi wa ahpye ai gaw koi woi gumgai nang gaw" ngu na she "E woi gumgai dai kaw e ahka dai grai sung ai i" ngu jang she sung ai mung ntsun nsung ai mung ntsun na she "Sung sung tang tang magyi ka-ang ang" ngu ai da. Shaloi jang gaw "Gumgai mung e ahka sung ai i nsung ai ngu na she san ai mi" ngu jang she "Sung sung tang tang magyi ka-ang ang" ngu na dai hku sha tsun ai da. Shaloi gaw dai Hkrai Naw wa gaw adup sat kahtam sat nna dai madu jan sanit hte shanthe gaw dai hka kau gaw dai woi gumgai dai hpe kapung sha kau da ai da. Kapung sha kau da nna dai ja shingwoi mung la mat wa rai na she hka hku de bai kahpu e bai tam lung mat wa rai yang she htaw grai tsan ai kaw she hka kau kaw hpun kaba tu ai da. Hpun kaba tu ai dai shi kahpu gaw hpun kaba ntsa kaw pinra ra la na she pali shit dung nga da. Shaloi gaw shanhte gaw dai hka kau hku lung wa rai yang she kahpu ba pali shit dung nga ai pali mali dat ai pali pumun hka kaw hkrat yawng pru wa ai da. Shaloi gaw "E ya ndai kaw pali pamun wa ahkrat ai gaw" ngu na she ntsa de hpun ndung de mada yu yang she kahpu Hkrai Gam wa dai kaw dung nga la ai da. Shaloi jang she "Hey htawra hpun ndung kaw dung nga ai gaw kadai re" ngu yang gaw "Ngai Hkrai Gam lo" ngu e "Ya dai de shaga ai gaw kadai rai ta" ngu jang she "Ngai Hkrai Naw lo" ngu na shan nau shada dai hku shaga hkat ai da. Shaloi gaw kahpu wa gaw yu wa na she "Ya le de ningrat hpe nmu ai i" ngu jang she "Nmu ai rat hpe nmu ai le woi gumgai langai mi gaw sai gawt gawt sha nga ai moi na an nau ja shingwoi ma hpye rai na sai gawt gawt sha dung nga ai woi gumgai langai mi hpe gaw nye e adup sat nna anhte kapung sha kau sai" ngu na tsun ai da. Shaloi jang gaw kahpu wa gaw "E e dai ningrat she re gaw, ya ningrat hpe wa nanhte kapung sha kau ya yang gaw ya wo mayu la ni grai law ai gaw. Shi kahpu gayung ni grai law ai grai law ai kaning di sana rai" ngu na kanau wa hpe dai hku tsun ai da. Shaloi jang she kahpu wa gaw dai shi madu jan woi num hpe sat sha kau ya na myit npyaw ai hku rai nga. Rai jang gaw myit npyaw ga ga ai da. Shaloi jang gaw kanau wa gaw "Ba e nra ai" dai madu jan ni hpe gaw le kaga kaw tawn da ai da. Shan nau gaw dai hku hkrum hkat shaga chyai nga rai yang she kahpu wa gaw madu jan hpe sat kapung sha kau ya na myit npyaw ga ga jang gaw "Ba nra ai ngai num sanit ting woi wa ai. Dai kaw na ba nang ra ai langai mi hpe lata la shangun na" ngu na shi dai hku kahpu wa hpe dai hku tsun ai da. Shaloi gaw kahpu wa mung myit pyaw rai na she "E ya dai ningrat a kahpu kayung ni bunglat hka sa hpyi sa na mara ai, kaning di sana kun Ma Naw e kaning di sana kun" ngu kahpu wa gaw hkrit taw ai da. Hkrit taw nga rai jang gaw kanau wa gaw "Nra ai ba hkum hkrit ngai chye ai hpa nhkrit ra ai. Ya galoi sa na da i dai galoi sa ai sha chye mayu ai" ngu na she "Naw san yu ga" ngu na rai jang she kaja wa kahpu gaw "Hpawtni din sa na nga ai da" ngu na dai hku bai tsun wa ai da. Shaloi jang gaw dai kahpu hpe she nlung woi hpai sai da. Wan jang jang tawn rai na she nlung woi hpai nna she nlung ram daw ram daw ram daw hpai dang dang re hpe tam hta la nna she wan jang hpun jum kaba ba hte hpai bang tawn wan jang jang tawn na she nlung ju. Ju hkrai ju tawn ju hkrai ju tawn di na she shan nau gaw la nga sai da. La nga jang gaw kaja wa shanhte sa wa na nga shani gaw dai woi num a karat jan a mayu ni e sumpum sumpam yan sa wa masai da. Yan sa wa jang gaw "Dung ga dung ga dung ga dung ga" ngu na she wan jang kaw ju da ai jahkyeng da ai nlung dai she hta la na shadun ya, hta la na shadun ya rai jang she dai shawng du ai wa gaw dung dat ai hte she wat "Ah hte" ngu na she hprawng kahkan mat wa. Rai yang gaw nchye ai re nga yang gaw wo hpang na ni gaw ngai hte ngai di yan sa wa sam nga. Shaloi gaw wo ra wa hpe mung dai nlung kahtet ai hta tawn ya rai jang she dai wa mung sa dung kahtet la na hprawng mat wa. Langai bai du ai mung sa dung kahtet kapa la nna hprawng mat wa wa rai nna she dai hku rai mat ai da. Dai majaw daini woi ni maidang kaw e woi lahkum nga na ahkyeng rai na e wan ju manyin matin kau ai zawn re kap ai dai gaw dai shani kaw na re da. Rai na she dai kaw na gaw shan nau gaw dai mayu la ni hpe mung dan di na nlung hte maidang ju kapa jahprawng kau rai na gaw shan nau gaw num bai garan na hku bai rai wa sai da. Num garan ya kahpu wa hpe shi woi wa ai num garan ya na hku myit galaw wa sai da. Shaloi gaw shi gaw dai madu jan ni kaw bai sa wa na she madu jan dai shi law ra ai jan hpe gaw nshakya shangun ai da. Nshakya shangun rai jang gaw wo shi loimi chyi mi ai nra ai ni hpe gaw shakya hkrai shakya shangun, shakya hkrai shakya shangun di jang gaw "Gai gai ya ba nang ra ai sa lata la sanu" ngu na kahpu ba hpe num lata la shangun ai da. Shaloi rai jang gaw kahpu ba gaw wo ra grau tsawm ai jan hpe e shi la ai da. La nna dai hku nga nga, nga nga rai jang she dai kanam jan ngu na dai gaw mi gaw Hkrai Naw wa ra ai hpe gaw nshakya shangun jang she hpang e bai shakya jang gaw grau bai tsawm mat. Shaloi jang gaw kahpu wa gaw dai kanau wa a num dai hpe ra mayu manawn myit npyaw rai na she dai Hkrai Naw wa gaw num tsawm dai lu nna kahpu wa gaw num tsawm dai ra mayu na she kahpu wa kanau wa hpe manawn myit npyaw sai da. Myit npyaw rai jang gaw wo nam de e nbung hku kaba ngu ai nga ai da. Shi gaw dai kahpu wa gaw nam wam sai ngu jang she dai sa mu da jang she nbung hku kaw she nam shabung she dan hkrai dan bum dan hkrai dan bum tawn di na she e dai kaw nam ntsa kaw nam dan bum jang gaw le kata de nbung bung pru wa jang gaw dai nam shabung dai ni gaw wawng wawng rai na ding yang shamu taw ai da. Shaloi jang gaw kahpu wa gaw wa nna she "E ma naw e ba shan grai sha mayu ai. Shan grai sha mayu ai wo kaw mani ba nam wam yang sa mu da ai wa du tsip nga nga ai. Dai kaw wa du sa kahtam sha ga ba shan grai sha mayu taw nga ai" ngu na rai jang she "Mai ai le sa, sa kahtam sha ga" ngu na she shan nau gaw sa mat wa sai da. Sa wa yang gaw loi mi tsan ai kaw na she "Wo gaw wo gaw, wo ra re wo awawng rai wo shamu nga ai mada yu u" ngu na she kaja wa kanau mung atsawm sha yu yu yang she kaja wa "Wawng wawng wawng" rai na shamu taw nga sai da. Shaloi jang gaw kanau wa gaw "Kaja wa sha rai nga ai" ngu na she e dai nbung hku kaw magap kahpu sa dan magap da ai dai kaw kawawng jang she wa du rai sai ngu na she shi gaw dai kaw sa gumhtawn, dai tsip kaw gumhtawn bun nna dai kaw kahtam sat la na hku myit nna dai kaw gumhtawn bang ai da. Gumhtawn bang jang gaw shi gaw le nbung hku kata de e di hkrat bang mat wa sai da. Di hkrat bang mat wa rai jang gaw shi gaw dai kaw di hkrat rawng mat rai jang gaw kahpu wa gaw nta de wa nna she dai shi grai ra ai num dai jan hpe kahpu wa bai wa la kau ya ai da. Shaloi jang gaw shi gaw dai nbung hku kaw na di hkrat bang mat wa na she le kasang ga ngu ai ga de du mat wa ai da. Kasang ga kaw gaw kade ning sa nga kau ai gaw nchye ai. Dai kaw sa nga nga re she kasang ga na ni gaw ma kaji ji sha law ai ni dinggai dingla mat ai da. Ya na rai yang gaw anhte ga na rai yang gaw mali manga ning daram re ma masum mali ning lahkawng ni re gaw shabrang, mali manga ning daram re ni gaw shanhte gaw dinggai dingla sai da. Dan re hpa hpun mung ntu ai hkrungmu ginlang chyi chyi sha law ai she shanhte gaw yi hkyen sha ai nga na ningwa hte kran ai da. Dai e gaw Hkrai Naw wa gaw ata hte sha majoi mi sha gang baw dan rai jang gaw shanhte gaw mau ai da. Kasang ga na kasang kasha ma ni gaw masha ni gaw mau ai da. Rai na shi gaw kasang ga kaw kade ning sa nga mat ai mung nchye nga mat rai jang gaw shi na madu jan gaw shi Hkrai Naw hpe e grai nja ai da. Galoi raitim kahpu wa dan re tim mung e shi gaw madu wa hpe sha dum taw ai da. Shaloi gaw "Nye madu wa hpe kaning di shaw la na kun" ngu na shi dai hku myit da ai da. Myit taw nga rai jang gaw myit hkrai myit sumru yu rai na she e samyen hpe myit dum dat ai da. Samyen myit dum nna samyen hkan tam nam de samyen hkan tam la na she samyen htingga mi baw gun la na dai nbung hku kaw e samyen htingga mi sa gun ru bang ai da. Shaloi gaw samyen dai gaw nbung hku dai hku le kasang ga du mat wa na she le kaw du ai hte she tu pru wa na hku rai nga. Shaloi jang she jahku ning ngu na kaw she ndai dinghta ga de bai tu pru lung wa ai da. Jahku ning ngu na kaw she dinghta ga de bai samyen ru dai bai tu pru wa rai jang gaw, samyen ru dai kaba wa ai hte gaw dai Hkrai Naw wa gaw dai samyen ru dai kaw noi hkrai noi noi hkrai noi na she dinghta ga de bai lu pru wa sai da. Lu pru wa jang gaw dai Hkrai Gam wa gaw dai madu jan ni hpe madu sha nna shi gaw padang manau nau sha nna dai mung dai hku na ni hpe e manau woi nau sha nga ai da. Manau poi galaw poi kaba um galaw nna nga nga ma ai da. Dan re kaw she dai Hkrai Naw wa gaw dai nbung hku kaw na samyen ru madu jan sa ru bang da ai samyen ru tu wa ai dai kaw noi nna pru wa. Yu yang she mare kaw dai dan rai na poi kaba galaw taw nga ma ai wa mu wa na ai da. Shaloi gaw shi gaw le lam lamaw kaba kaw mu nmu re kaw wa tsap taw nga jang she gumgai langai mi gaw mu ai da. Shaloi jang gaw gumgai dai gaw "E le ra kaw ala langai mi sa gaw nsa wa re mi tsap taw nga ai lo manam tau ai ni e" ngu na wa tsun dan ai da. Shaloi jang she dai ni mung sa chyan yu yang she le tsap nga ai da. Sa gaw bai nsa wa rai, rai jang she htaw dai kahpu Hkrai Gam wa ngu na dai gaw hkaw hkam galaw sam nga gaw. E dai wa e bai wa tsun dan jang she "Sa woi la masu sa woi la masu kaning re manam kun sa woi la masu" ngu na tsun ai da. Shaloi jang gaw dai shi a shangun ma ni hpe sa woi la shangun yang nwa hkraw ai da. Langai hpe bai dat yang mung nwa hkraw, langai hpe bai dat yang mung nwa hkraw rai na she kade lang sa woi tim nwa hkraw rai jang gaw hpang jahtum gaw dai poi wang de gaw du gaw du wa sai da. Poi wang de du na chyinghka lam kaw na nhku de nshang, wang kata de nshang hkraw ai da. Wang chyinghka lam kaw wa tsap taw nga rai she shi amat salang ni she ngai mi sa woi shangun yang nwa, ngai mi e sa woi shangun yang mung nwa. "E madu e nwa hkraw ai law" ngu wa tsun wa tsun wa tsun rai "Ah kaning rai na me kaning re manam wa rai daw goi daini ting wa rit nga sa shaga yang nwa hkraw ai gaw kaning re masha manam wa re daw goi" ngu na Hkrai Gam wa gaw dai hku pawt nna tsun ai da. Tsun na she hpang jahtum gaw "E nang she sa woi la u law, na manam gaw nang she sa woi u law. Anhte gaw kade woi yu tim nwa hkraw ai" ngu na dai ni gaw dai hku bai tsun ai da. Shaloi jang gaw kaja wa shi rawt nna sa wa nna she wang chyinghka lam de sa wa nna sa yu yu ai da. Sa yu yu yang wa she kanau Hkrai Naw wa she tsap taw nga la. Kanau Hkrai Naw wa she tsap taw nga la rai jang she kanau Hkrai Naw wa mung kahpu wa sa shaga dat ai hte she dai shi na nhkang kawngli hte e gap sat kau ai da. Dai Hkrai Gam wa hpe e kanau Hkrai Naw wa dai shi wang chyinghka lam kaw nan nhkang kawngli hte gap sat kau ai da. Shing rai na dai shani kaw na kahpu anhte Wunpawng hpan ni e kahpu kanau sat hkat ai lamik kumla labau maumwi dai kaw na e daini du hkra byin mat wa ai re da. Dai hku nga na hkai dan ma ai. . Language as given: Jinghpaw
Format:		Digitised: no Media: Audio
Identifier:		KK1-2457
Identifier (URI):		http://catalog.paradisec.org.au/repository/KK1/2457
Language:		Kachin
Language (ISO639):		kac
Rights:		Open (subject to agreeing to PDSC access conditions)
Subject:		Kachin language
Subject (ISO639):		kac
Subject (OLAC):		language_documentation
		text_and_corpus_linguistics
Table Of Contents (URI):		http://catalog.paradisec.org.au/repository/KK1/2457/KK1-2457-A.mp3
		http://catalog.paradisec.org.au/repository/KK1/2457/KK1-2457-A.wav
		http://catalog.paradisec.org.au/repository/KK1/2457/KK1-2457-A.eaf
Type (DCMI):		Sound
Type (OLAC):		primary_text
OLAC Info
Archive:		Pacific And Regional Archive for Digital Sources in Endangered Cultures (PARADISEC)
Description:		http://www.language-archives.org/archive/paradisec.org.au
GetRecord:		OAI-PMH request for OLAC format
GetRecord:		Pre-generated XML file
OAI Info
OaiIdentifier:		oai:paradisec.org.au:KK1-2457
DateStamp:		2021-07-07
GetRecord:		OAI-PMH request for simple DC format
Search Info
Citation:		Keita Kurabe (compiler); Keita Kurabe (depositor); Marip Htu (speaker). 2019. Pacific And Regional Archive for Digital Sources in Endangered Cultures (PARADISEC).
Terms:		area_Asia country_MM dcmi_Sound iso639_kac olac_language_documentation olac_primary_text olac_text_and_corpus_linguistics
Inferred Metadata
Country:		Myanmar
Area:		Asia